Connect with us

Review

‘ஜெய் பீம்’ : விமர்சனம்.

Published

on

‘முதனை’ கிராமம், இது தமிழ்நாட்டின் கடலூர் மாவட்டத்தில் உள்ள ‘கம்மாபுரம்’ ஒன்றியத்தில் அமைந்துள்ளது. இந்த கிராமத்தில் வாழ்ந்து வரும் ‘இருளர்’ இன மூதாட்டி பார்வதி(75). இவரது வாழ்க்கையில் நடந்த உண்மை சம்பவத்தினை அடிப்படையாக கொண்டே ‘ஜெய் பீம்’ உருவாகியுள்ளது.

முதன்மை கதாபாத்திரங்களாக மணிகண்டன், லிஜோமோல் ஜோஸ் நடித்துள்ளனர். இவர்களுடன் ரஜிஷா விஜயன், பிரகாஷ்ராஜ், எம்.எஸ்.பாஸ்கர், இளவரசு உட்பட, பல புதுமுக நடிகர்களும் நடித்துள்ளனர்.

வழக்கறிஞராக முக்கிய கதாபாத்திரத்தில் சூர்யா நடித்திருக்கிறார். த.செ.ஞானவேல் இயக்கியிருக்கிறார். ‘2டி என்டர்டெயின்மென்ட்’ நிறுவனம் தயாரித்துள்ளது. எப்படியிருக்கிறது? ‘ஜெய் பீம்’.

ஒரு வீட்டிற்குள் புகுந்த பாம்பினைப் பிடிக்க வரவழைக்கப்படுகிறார் மணிகண்டன். அவர் பாம்புப் பிடித்துச் சென்ற அடுத்த நாள் அந்த வீட்டில் கொள்ளை நடக்கிறது. செல்வாக்கு மிகுந்த அந்த வீட்டுக்காரர் மாவட்ட போலீஸ் உயரதிகாரிகளுக்கு பிரஷர் கொடுக்கிறார். அதே பிரஷர் இரு மடங்காக லோக்கல் ஸ்டேஷன் எஸ்.ஐ. தமிழுக்கு திரும்புகிறது.

இதனால் மணிகண்டனுடன் அவரது உறவினர்கள் சிலரும் வலுக்கட்டாயமாக கைது செய்யப்படுகிறார்கள். அங்கே அவர்கள் கடும் சித்ரவதைக்கு ஆளாக்கப்பட்ட நிலையில், அவர்கள் தப்பித்து ஓடியதாக போலீஸ் தேட ஆரம்பிக்கிறது. அதன் பிறகு என்ன நடந்தது? என்பது தான், ‘ஜெய் பீம்’ படத்தின் திரைக்கதை மற்றும் க்ளைமாக்ஸ்!

படம் ஆரம்பித்த அடுத்தடுத்த காட்சிகளின் தொகுப்பு அதிரவைக்கிறது. விடுதலையாகி வெளியே வருபவர்களை ஜெயில் வாசலிலேயே பங்குபோட்டு பொய் வழக்குப் போடும் காட்சி, ஜெயிலில் நடக்கும் சித்ரவதை காட்சி, போன்றவை போலீஸ் அரஜாகத்தின் உச்சத்தை காட்டுகிறது.  இதுபோல் போலீஸ் வரலாற்றில் இருந்து மறைக்கப்பட்ட, கிழிக்கப்பட்ட பக்கங்கள் ஏராளம்!!

பாதிக்கப்பட்ட இருளர்களின் வாழ்வியலை சொல்லும்போது அது ஆவணப்படமாக மாறும் வாய்ப்புக்கள் வந்துவிடும். ஆனால் பா.கிருத்திகாவின் திரைக்கதை, ஆரம்பம் முதல் இறுதிவரை நெஞ்சம் தடதடக்க ஒரே நேர்க்கோட்டில் பயனிக்கிறது. அடுத்தடுத்த எதிர்பாரத திருப்பங்களால் ஒரு விறுவிறுப்பான திரில்லர் பார்ப்பது போன்ற உணர்வைத் தருகிறது. மர்ம முடிச்சுக்கள் அவிழும் காட்சிகளில் பிலோமின் ராஜின் எடிட்டிங் சூப்பர். திரைக்கதையைப் போலவே எஸ்.ஆர்.கதிரின் ஒளிப்பதிவும், ஷான் ரோல்டனின் இசையும் படத்தின் சிறப்பினை மேம்படுத்துகிறது. அதிலும் ‘ஸ்க்ரோலிங் டைட்டில்’ போடும்போது இடம்பெறும் இசை இன்டர் நேஷனல் லெவல்!

கதாநாயகன் மணிகண்டன், மிகச்சரியான தேர்வு. நேர்த்தியாக நடித்திருக்கிறார். கதாநாயகியாக லிஜோமோல் ஜோஸ், இருளர் இனப் பெண்ணாகவே மாறியிருக்கிறார். மணிகண்டனுடன் வயலில் ‘எலி’ பிடிக்கும்போது செய்யும் ரொமேன்ஸ் காட்சியிலும், போலீஸ் கொதறிப்போட்ட கணவனை பார்த்து அழுவதிலும், தனிப்பட்ட நடிப்பினை கொடுத்துள்ளார்.

சூர்யா, பிரகாஷ்ராஜ் சிலகாட்சிகளில் சந்தித்துக்கொண்டாலும் அந்தக்காட்சிகள் அழுத்தமானவை. பிரகாஷ்ராஜ் கண்களினாலேயே வசனம் பேசுகிறார்.

மாநில அரசின் ‘தலைமை’ வழக்கறிஞராக நடித்திருக்கும் ராவ் ரமேஷ் பெர்ஃபெக்ட்!. குருசோமசுந்தரம், அரசு வழக்கறிஞர்களை அப்படியே இமிட்டேட் செய்திருக்கிறார். அதேபோல் நீதிபதிகளாக வருபவர்களும். ஒரு தீர்ப்பின் போது சூர்யாவை பாராட்ட, நீதிபதி தன்னுடைய பேனாவின் பின் முனையால், மேஜையில் தட்டி பாராட்டு தெரிவிப்பது, சிறப்பு! இப்படிப் படத்தில் நடித்துள்ள பலரும் அந்தந்த கதாபாத்திரங்களில் சிறப்பாக நடித்திருக்கிறார்கள். சினிமாவில் பல கோர்ட்டுகள் காண்பிக்கப்பட்டிருந்தாலும் இந்தக்கோர்ட் நம்பகத் தன்மையுடன் இருக்கிறது.

எஃபெக்ட்ஸ், லோ ஆங்கிள், டாப் ஆங்கிள், பில்டப் ஷாட்ஸ் இத்யாதி.. தயவுகளினால் மட்டுமே காலம் தள்ளும் நடிகர்களுக்கு மத்தியில், அவ்வப்போது சூர்யா இப்படிப்பட்ட படங்களில் நடிப்பது பாராட்டுக்குரியது. படம் முழுவதும் அசத்தியிருக்கிறார்.

காவல் துறையில் எதேச்சை அதிகாரம் கொண்டு செயல்படும் சிலருக்காக, அரசு இயந்திரம் என்னவெல்லாம் செய்யும் என்பதை தெரியாதவர்களுக்கு தெரியப் படுத்தி இருக்கிறார்கள்.

மிகப்பெரிய ஒரு விஷயத்தை, சமூக பொறுப்புடன் படமாக்கிய இயக்குனர் த.செ.ஞானவேல் பாராட்டுக்குரியவர்.

‘ஜெய் பீம்’ படத்தினை தயாரித்த ‘2டி என்டர்டெயின்மென்ட்’ நிறுவனம், பெருமை பெறும்.

தமிழ்ச்சினிமாவின் தவிர்க்கமுடியாத படங்களுடன் ‘ஜெய் பீம்’ இணைகிறது.  அனைவரும் பார்க்க வேண்டிய  படம்.

‘ஜெய் பீம்’ படத்தின் அனைத்து தொழில் நுட்பக் கலைஞர்களும் சிறப்பாக பணிபுரிந்துள்ளனர். திரைப்படக்கல்லூரி மாணவர்கள் கண்டிப்பாக பார்க்கவேண்டிய படம்.

Advertisement
Click to comment

Leave a Reply

Your email address will not be published. Required fields are marked *

Cinema News

‘சபாபதி’ : விமர்சனம்.

Published

on

By

‘சபாபதி’ படத்தில் ‘திக்குவாய்’ அப்பாவி இளைஞர் கதாபாத்திரத்தில் சந்தானம் நடித்திருக்கிறார். அவருக்கு ஜோடியாக பிரீத்தி வர்மா நடித்திருக்க, இவர்களுடன் எம்.எஸ்.பாஸ்கர், ஷாயாஜி ஷிண்டே, வம்சி, மயில்சாமி, லொல்லு சபா சாமிநாதன், மாறன், ‘குக்கூ வித் கோமாளி’ புகழ்,  உள்ளிட்ட பலர் நடித்துள்ளனர்.

RK Entertainment சார்பில் ரமேஷ்குமார் தயாரித்துள்ள இந்தப்படத்தினை ஶ்ரீனிவாசராவ் இயக்கியிருக்கிறார்.

சந்தானம் நடித்து இதுவரை வெளிவந்த டகால்ட்டி, பிஸ்கோத், பாரிஸ் ஜெயராஜ், டிக்கிலோனா ஆகிய படங்கள் ரசிகர்களை பெரிதாக கவராத நிலையில் தற்போது வெளியாகியுள்ள ‘சபாபதி’ ரசிகர்களை கவர்ந்துள்ளதா, இல்லையா?

சிறுவயது முதலே ‘திக்குவாய்’ பிரச்சனை காரணமாக பலராலும் அவமானப் படுத்தப்படுகிறார் சந்தானம். அவருக்கு பெரிய ஆறுதலாக இருப்பவர் ப்ரீத்தி வர்மா. நெருங்கிய நண்பர்களான இருவரும் எதிரெதிர் வீடுகளில் வசிக்கின்றனர். சந்தானம் அவரையே கல்யாணம் செய்து கொள்ள நினைக்கிறார். ஆனால் வேலை கிடைத்தால் தான் கல்யாணம் நடக்கும் என்ற சூழ்நிலை. இதன் பிறகு என்ன நடந்தது? என்பது தான் ‘சபாபதி’ படத்தின் கதை.

‘சபாபதி’ கதாபாத்திரத்திற்கேற்ற அருமையான பாடி லாங்குவேஜ். சந்தானம், மிகச்சிறப்பாக நடித்திருக்கிறார். வெகுளித்தனமாக அவர் செய்யும் செயல்கள் பரிதாபம் ஏற்படுத்துகிறது. இது ஒன்று மட்டுமே படத்தில் சிறப்பு. மற்றபடி எல்லாமே சுத்த பேத்தல்!

சந்தானத்தின் அப்பாவாக ‘கணபதி வாத்தியார்’ என்ற கதாபத்திரத்தில் எம்.எஸ்.பாஸ்கர் நடித்திருக்கிறார். இயக்குனருக்கு ‘கணபதி வாத்தியார்’ மேல் என்ன கோபமோ? சந்தானத்தின் உதவியோடு அவர் தலையில் வாந்தி எடுக்கவைத்தும், வாயில் மூத்திரம் அடிக்க வைத்தும் கேவலபடுத்தியிருக்கிறார்!!

ஷாயாஜி ஷிண்டே, வம்சி, மயில்சாமி, லொல்லு சபா சாமிநாதன், மாறன், ‘குக்கூ வித் கோமாளி’ புகழ்,  ரமா என படத்தில் நடித்தவர்கள் அனைவரும்  இயக்குனர் என்ன சொன்னாரோ அதை செய்திருப்பதாகவே தெரிகிறது.

ஒளிப்பதிவாளர் பாஸ்கர் ஆறுமுகம், இசையமைப்பாளர் சாம் சி.எஸ் கூட்டணியில் ‘மயக்காதே மாயக் கண்ணா’ பாடல் அருமை. பார்க்கவும், கேட்கவும் சுகமாக இருக்கிறது.

வாந்தி எடுப்பது, வாயில் மூத்திரம் அடிப்பது, காதலியின் அம்மாவை டிக்கியில் எட்டி உதைப்பது இவையெல்லாம் தான் காமெடி என நினைத்து படமாக்கியிருக்கிறார், இயக்குநர் சீனிவாச ராவ்.

மொத்தத்தில், ‘சபாபதி’ சந்தானத்தின் நடிப்பில் வேளியாகியுள்ள இன்னொரு தோல்விப் படம்.

Continue Reading

Cinema News

‘பொன் மாணிக்கவேல்’ : விமர்சனம்.

Published

on

By

‘பொன் மாணிக்கவேல்’ என்ற தலைப்பும், பிரபுதேவா போலீஸாக முதன்முறையாக நடிப்பதாலும், இந்தப்படம் ரசிகர்களிடம் எதிர்பார்ப்பினை ஏற்படுத்தியிருந்தது. அந்த எதிர் பார்ப்பினை பூர்த்தி செய்துள்ளதா?

நேர்மையான போலீஸ் அதிகாரி பிரபுதேவா. ஜெயில் தண்டனை பெற்றதால், பணியை ராஜினாமா செய்துவிட்டு விவசாயம் செய்து கொண்டிருக்கிறார். இந்நிலையில் சென்னையில் நீதிபதி ஒருவர் கொடூரமாக கொலை செய்யப் படுகிறார். காவல்துறைக்கு சவாலாக இருக்கும் அந்த கொலை வழக்கிற்காக பிரபுதேவாவின் உதவியை நாடுகின்றனர்.

மீண்டும் பிரபுதேவா, போலீஸ் அதிகாரியாக பதவி ஏற்கிறார். நீதிபதியின் கொடூர கொலைக்கான காரணம் என்ன? கொலையாளிகளை கண்டு பிடித்தாரா, இல்லையா? என்பது தான் ‘பொன் மாணிக்கவேல்’ படத்தின் கதை.

பெண்களுக்கு எதிரான பாலியல் துன்புறுத்தல்களுக்கு பாரபட்சமின்றி தண்டனை கொடுக்கப்பட வேண்டும் என்பதை வலியுறுத்தியுள்ளார், இயக்குநர் ஏ.சி.முகில் செல்லப்பன். அதற்காக அவரை பாராட்டலாம்.

சாயம் போன ‘காக்கி’ சட்டையை பிரபு தேவாவுக்கு போட்டுவிட்டுள்ளனர். காவல் துறையில் சுவாரஸ்யமான எண்ணற்ற கதைகள் கொட்டிக் கிடந்தாலும், பல இயக்குனர்கள் சுவாரஸ்யமற்ற கதைகளையே தேர்ந்தெடுக்கின்றனர். அதையே ஏ.சி.முகில் செல்லப்பன் தேர்ந்தெடுத்துள்ளார்.

கதை பழையது என்றாலும் திரைக்கதையில் சுவாரஸ்யம் கூட்டியிருந்தால் ஓரளவுக்காகவாவது நன்றாக இருந்திருக்கும். ஏதோ வந்தோம், போனோம் என்ற நிலையில் இருக்கிறது பிரபு தேவாவின் நடிப்பு. இயக்குனர், பிரபு தேவாவை சரியாக பயன் படுத்தவில்லையோ! என்ற எண்ணமும் ஏற்படுகிறது.

கதாநாயகி நிவேதா பெத்துராஜ் பிரபு தேவாவின் மனிவியாக நடித்துள்ளார் அவ்வளவே!

வில்லன்களாக சுரேஷ் மேனன், சுதன்சு பாண்டே நடித்துள்ளனர். இவர்களுடன் இயக்குநர் மகேந்திரன், பாகுபலி பிரபாகர், தான்யா ஆகியோரும் நடித்துள்ளனர்.

ஒளிப்பதிவு கே.ஜி.வெங்கடேஷ், இசை டி.இமான் மற்றபடி குறிப்பிட்டு சொல்ல ஒன்றும் இல்லை

‘பொன் மாணிக்கவேல்’ என்ற பெயரில் இருக்கும் கம்பீரம், படத்தில் இல்லை.

Continue Reading

Cinema News

‘கடைசிலே பிரியாணி’ : விமர்சனம்.

Published

on

By

கேரளத்தின் அடர்ந்த வனப்பகுதியில் உள்ள ரப்பர் தோட்டத்தில் நடக்கும் ஒரு கொலையின் பின்னணியே படத்தின் கதை. பல படங்களில் நாம் பார்த்த சாதாரண பழிவாங்கும் கதை தான். ஆனால் வித்தியாசமான முறையில் சொல்லியிருக்கிறார், இயக்குநர் நிஷாந்த் களிதிண்டி.

மூன்று சகோதரர்கள், அவர்களது அப்பாவின் கொலைக்கு பழிதீர்க்க ஒன்று சேருகின்றனர். ஆனால் அதில் ஒருவருக்கு விருப்பமில்லை. இருந்தாலும் மற்ற இருவரால் அவர் வலுக்கட்டாயமாக இழுத்து செல்லப்படுகிறார்.

கொலை செய்துவிட்டு திரும்பும் வழியில் நடக்கும் ஒரு சம்பவம் அவர்களுக்கு திகில் ஏற்படுத்துவதுடன், படம் பார்ப்பவர்களுக்கும் திகிலூட்டுகிறது. இது அவர்கள் செய்த பாவமா? விதியா? எப்படி வேண்டுமானாலும் சொல்லலாம்.

படத்தில் நடித்த அனைவருமே சிறப்பாக நடித்திருக்கின்றனர். அதிலும் மூன்று சகோதரர்களாக நடித்திருக்கும் வசந்த் செல்வம், தினேஷ் மணி, விஜய் ராம் ஒவ்வொருவரும் தங்களுக்கு கொடுத்த வேலையை சிறப்பாக செய்துள்ளனர். இதில் தினேஷ் மணிக்கு நடிக்க ஒரு சில காட்சிகள் மட்டுமே. ஆனால் மற்ற இருவருக்கும் பல காட்சிகள் கிடைத்திருக்கிறது.

மூத்த சகோதரராக வரும் தினேஷ் மணி முரட்டு விழிகளில் மிரட்டுகிறார்.

கடைக்குட்டியாக வரும் விஜய் ராம், அப்பாவி சிறுவனாக நடித்து மனதை கொள்ளை கொள்கிறார். அதிலும் ‘சைக்கோ’ வில்லன் ஒரு புறமும், போலீஸ் ஒரு புறமும் துரத்த மூச்சு வாங்கிய நிலையில், வயதான மூதாட்டி ஒருவரிடம் ‘லெமன் சோடா’ கேட்கும் காட்சியில் குபீர் சிரிப்பினை வரவழைக்கிறார். மொத்த தியேட்டரும் சிரிக்கிறது.

‘சைக்கோ கில்லராக’ நடித்திருக்கும் ஹக்கிம் ஷாஜாகான், செம்ம டெர்ரர்! பார்ப்பதற்கு பழமாக இருந்தாலும் நடிப்பினில் பயமுறுத்துகிறார்.

ஹெஸ்டின் ஜோஸ் ஜோசப் மற்றும் அஷீம் மொஹமத் ஆகியோரின் ஒளிப்பதிவு நேர்த்தி.

வினோத் தணிகாசலம், ஜுடா பவுல், நீல் செபஸ்டியன் ஆகியோரது கூட்டணியில் இசை காட்சிகளுக்கு பலம் சேர்த்துள்ளது.

ஓரே லொக்கேஷன், ஓரிரு நடிகர்களை வைத்துக்கொண்டு குறிப்பிட்டு, பாராட்டும் படியான படத்தினை கொடுத்துள்ளார் இயக்குனர் நிஷாந்த் களிதிண்டி.

சில காட்சிகளும், வசனங்களும் அருவறுப்பாக இருக்கிறது.

ஹாலிவுட் ‘சைக்கோ’ படங்களை பார்ப்பவர்களுக்கு ‘கடைசீல பிரியாணி’ பிடிக்கலாம்!

Continue Reading
Advertisement

Copyright © 2021 Chennai Editor. Designed by Trendsz Up.