சாய் அபயங்கர் – பாக்யஸ்ரீ போர்ஸ் காம்போவில் ‘பாப்-கவ்வாலி’ ட்ரீட்!

‘கட்சி சேர’ (Katchi Sera) மற்றும் ‘ஆச கூட’ (Aasa Kooda) போன்ற சுயாதீன இசைப் பாடல்கள் மூலம் உலகளாவிய இசை ரசிகர்களைத் தன்பக்கம் ஈர்த்த பிரபல இளம் இசையமைப்பாளரும் பாடகருமான சாய் அபயங்கர், தனது ஆறாவது சுயாதீன (Indie) இசைப் படைப்பான ‘ரதிமா’ (Radhimaa) பாடலை திங்க் இண்டி (Think Indie) நிறுவனத்தின் மூலம் அதிகாரப்பூர்வமாக வெளியிட்டுள்ளார்.

வழக்கமான சோகப் பாடல் பாணிகளை உடைத்து, நவீன மேற்கத்தியப் பாப் (Pop) இசையையும், பாரம்பரியக் கவ்வாலி (Qawwali) இசைச் சாயலையும் மிக நேர்த்தியாக ஒன்றிணைத்து, காதுகளுக்கு ஒரு புதிய மாறுபட்ட இசை அனுபவத்தை சாய் அபயங்கர் இப்பாடலின் மூலம் வழங்கியுள்ளார். பிரியும் காதலைச் சோகமாகக் காட்டாமல், இளமைத் துடிப்புடனும் நேர்மறையான வாழ்வியல் உணர்வுகளுடனும் (Positive Vibes) எடுத்துரைக்கும் வகையில் இதன் இசைக்கோர்ப்பு வடிவமைக்கப்பட்டுள்ளது.

இப்பாடலின் பிரம்மாண்டமான அறிமுக விழா, சென்னையில் உள்ள புகழ்பெற்ற ராஜலட்சுமி பொறியியல் கல்லூரியில் (Rajalakshmi Engineering College) கோலாகலமாக நடைபெற்றது. கல்லூரித் திருவிழா மேடையில் நடைபெற்ற இந்த நிகழ்வில் 13,000-க்கும் மேற்பட்ட மாணவ, மாணவிகள் கலந்துகொண்டு, பாடலை நேரலையில் கேட்டுப் பெரும் ஆரவாரத்துடன் கொண்டாடி மகிழ்ந்தனர்.

இப்பாடலின் அழகிய வண்ணமயமான இசை வீடியோவில் சாய் அபயங்கருடன் இணைந்து, பிரபல இளம் நடிகை பாக்யஸ்ரீ போர்ஸ் முதன்மைக் கதாபாத்திரத்தில் நடித்துள்ளார். திறமைமிகு இயக்குநர் தேஜோ பரத்வாஜ் இயக்கத்தில் தீப்பெட்டி பிக்சர்ஸ் (Theepetti Pictures) மற்றும் பிரவுன் க்ரூ புரொடக்ஷன்ஸ் நிறுவனங்கள் இணைந்து தயாரித்துள்ள இந்த மியூசிக் வீடியோ, பாடலின் அதிவேக எனர்ஜிக்கும், அதில் ஒளிந்துள்ள உணர்ச்சிகரமான காதலின் கருப்பொருளுக்கும் காட்சி ரீதியாகப் பெருமளவில் வலு சேர்க்கும் வகையில் நேர்த்தியாகப் படமாக்கப்பட்டுள்ளது.