சென்னை சர்வதேச திரைப்பட விழாவில் பங்கேற்ற ‘டிராக்டர்’ திரைப்படம்!

‘ஜெயிலர்’, ‘ஜவான்’, ‘லியோ’, ‘அயலான்’, ‘Goat’, ‘கல்கி’, ‘புஷ்பா-2’ ஆகிய திரைப்படங்கள் உட்பட உலகளாவிய பல திரைப்படங்களை, பிரான்ஸ் நாட்டில் வெளியிடும் நிறுவனமான ‘Friday Entertainment’ சார்பாக தயாரிப்பாளர் ஜெயந்தன் தயாரித்திருக்கும் படம் ‘டிராக்டர்’.

இத்திரைப்பட குழுவினர் பெரும்பாலும் அறிமுக கலைஞர்களாவர். இயக்குநரைப் போலவே இந்தப் படத்தின் நாயகன் பிரபாகரன் ஜெயராமன் மற்றும் நாயகி ஸ்வீதா பிரதாப் இருவரும் IT துறையைச் சேர்ந்தவர்கள். இந்த படத்தின் மூலம் நடிகர்களாக அறிமுகமாகிறார்கள்.துணை கதாபாத்திரத்தில் சமீபத்தில் மறைந்த பிள்ளையார்பட்டி ஜெயலட்சுமி, சிறுவன் கோவர்தன் மற்றும் இயக்குநர் ராம் சிவா ஆகியோர் நடித்துள்ளனர்.இத்திரைப்படத்திற்கு கௌதம் முத்துசாமி ஒளிப்பதிவாளராகவும், R.சுதர்சன் படத் தொகுப்பாளராகவும், ஒலி வடிவமைப்பை ராஜேஷ் சசீந்திரன் மற்றும் தயாரிப்பு வடிவமைப்பை பிரபல கலை இயக்குநர் டி.முத்துராஜ், Subtitle பணியை Rehks அவர்களும் செய்துள்ளார்கள். பத்திரிக்கை தொடர்பு – புவன் செல்வராஜ், தயாரிப்பு – ஜெயந்தன்.

இந்த ‘டிராக்டர்’ திரைப்படம் நமது விவசாயிகளின் படிப்பறிவு இல்லாத நிலையை பயன்படுத்தியும், குறைந்த முதலீட்டில் அதிக லாபம் பெறலாம் என சொல்லி தனியார் கம்பெனிகள் செய்துவரும் ஏமாற்று வேலைகளையும் மையமாக வைத்து உருவாக்கப்பட்டுள்ளது.

இயக்குநர் ரமேஷ் யந்த்ரா இயக்கிய இந்த ‘ டிராக்டர்’ தமிழ் திரைப்படம் முதன்முதலில் பிரேசிலில் உள்ள 48 வது São Paulo International Film Festival-லில் புதுமுக இயக்குநர் பிரிவில் World Pemiere ஆக கடந்த அக்டோபர் மாதம் திரையிடப்பட்டது.

இந்தப் படத்தின் இயக்குநரான ரமேஷ் யந்த்ரா சென்னை ஓவியக் கல்லூரியின் முன்னாள் முதுகலை மாணவர் ஆவார். இது அவரது முதல் திரைப்படமாகும். இவர் தகவல் தொழில் நுட்பத் துறையில் இருந்து வந்தவர். ஏற்கனவே ‘குடியம் குகைகள்’ மற்றும் ‘இந்திய தொல் பழங்காலத்தின் தந்தை’ ஆகிய ஆவணப் படங்களால் அறியப் பெற்றவர்.ஆசிய அளவில் வேறு எங்கும் திரையிடப்படாத இந்த ‘டிராக்டர்’ திரைப்படம், தற்போது சென்னையில் நடைபெற்று வரும் 22-வது சென்னை சர்வதேச திரைப்பட விழாவில் உலக சினிமா பிரிவில் இன்றைக்கு டிசம்பர் 14 -ம் தேதி PVR – சத்யம் திரை அரங்கில் திரையிடப்பட்டது.

பாரம்பரியமான நமது விவசாயத்தை இன்றைய கார்ப்பரேட் நிறுவனங்கள் எப்படி அழிக்கின்றன என்பதை மக்களுக்கு உரக்கச் சொல்ல வரும், இந்த ‘டிராக்டர்’ படம் விரைவில் உலகம் முழுவதும் திரையரங்குகளில் வெளியாக இருக்கிறது.