‘ஐஆம் கேம்’ – (விமர்சனம்.) துல்கர் சல்மானின் கையை இயக்கும் அமானுஷ்யம்!

ஒரு பெரும் தொழிலதிபரின் ஒரே மகனாகப் பிறந்து, எவ்விதத் திறமையும் இல்லாததால் தொழிலில் முன்னேற முடியாமல் குறுக்கு வழியில் பணம் சம்பாதிக்கத் துடிக்கும் சுபாவம் கொண்ட ‘டேன் ஜான்’ என்ற கதாபாத்திரத்தில் துல்கர் சல்மான் களம் இறங்கியுள்ளார். தனது தவறான பழக்கங்களால் தந்தையின் தொடர் இகழ்ச்சிக்கும் கோபத்திற்கும் ஆளாகும் அவர், எப்போதும் குடித்துவிட்டுச் சூதாட்டத்தில் ஈடுபட்டுப் பல கோடிகளை இழந்து கடுமையான கடனாளியாக மாறுகிறார். இதன் காரணமாகக் கடன் கொடுத்தவர்களுக்கும் அவருக்கும் இடையே ஏற்படும் ஒரு பயங்கரமான மோதலில், தப்பித்து ஓடும்போது எதிர்பாராத விதமாகத் தனது வலது கையை முற்றிலும் இழக்கிறார். இதனைத் தொடர்ந்து நடைபெறும் ஒரு அசாத்திய மருத்துவ அறுவைசிகிச்சை மூலம், விபத்தில் இறந்த வேறொரு நபரின் கையை அவருக்குப் பொருத்துகிறார்கள்.

அந்தப் புதிய கையைச் சீராக இயங்க வைப்பதற்காகப் பிசியோதெரபிஸ்ட் ‘இஷா’ ஆக வரும் காயடு லோஹர் அவருக்கு உதவுகிறார், அந்த மருத்துவப் பயணத்தில் இருவருக்கும் இடையே காதலும் மலர்கிறது. ஆனால், கை முழுமையாகச் சரியாக இயங்க ஆரம்பிக்கும் தருணத்தில் ஒரு மாபெரும் அதிர்ச்சி காத்திருக்கிறது. அந்தப் புதிய கை துல்கர் சல்மானின் மூளையின் கட்டளைக்கு இயங்க மறுப்பதுடன், அசாத்தியமான மாஸ் சக்தியுடன் விளங்கத் தொடங்குகிறது. மேலும், அவரது கட்டுப்பாட்டை மீறிச் சூதாட்ட உலகத்தின் டானாக வலம் வரும் மிஷ்கினைக் கொல்ல முயற்சிக்கிறது. தனது சொந்தக் கையே தமக்குக் கட்டுப்படாமல் வேறொரு அமானுஷ்ய சக்தியால் இயங்குவதைக் கண்டு நிலைகுலையும் துல்கர் சல்மான், அந்த கையின் பின்னணியில் இருக்கும் மர்மம் என்ன என்பதைக் கண்டுபிடித்தாரா, டான் மிஷ்கினுக்கும் அந்த கைக்கும் என்ன தொடர்பு, இந்த விசித்திரப் பிடியில் இருந்து அவர் தப்பித்தாரா இல்லையா என்ற விறுவிறுப்பான திருப்பங்களின் பின்னணியிலேயே ‘ஐஆம் கேம்’ திரைப்படத்தின் எஞ்சிய திரைக்கதை சுவாரசியமாக அமைக்கப்பட்டுள்ளது.

இத்திரைப்படத்தில் ‘டேன் ஜான்’ என்ற சவாலான கதாபாத்திரத்தில் துல்கர் சல்மான் தனது அசாத்திய நடிப்புத் திறனை அக்குவேறு ஆணிவேறாக வெளிப்படுத்தியுள்ளார். காதலின் மென்மை, தொழில்முறைத் தோல்விகளால் ஏற்படும் ஏமாற்றம், சூதாட்டக் களத்தில் கோடிக்கணக்கான பணத்தை இழந்து தவிக்கும் மனக்கவலை மற்றும் எதிரிகளுடன் மோதும் உக்கிரமான ஆக்‌ஷன் காட்சிகள் என உணர்ச்சிகளின் பல்வேறு பரிமாணங்களையும், தனது முதிர்ச்சியான நடிப்புத் திறனையும் மிக நெர்த்தியாக வெளிப்படுத்தி, திரையரங்கிற்கு வரும் ரசிகர்களைத் தனது அசாத்திய திரை ஆளுமையால் அவர் பெரிதும் ஈர்த்துள்ளார். அவருக்கு ஜோடியாக வரும் காயடு லோஹர், தனது வசீகரமான தோற்றத்தாலும் எதார்த்தமான நடிப்புத் திறன் மூலமாகவும் பார்வையாளர்களைக் கவர்ந்து, ஒட்டுமொத்தத் திரைக்கதையில் தனது இருப்பை மிகவும் அழுத்தமாகப் பதிவு செய்துள்ளார். அதேபோல், கிரிக்கெட் வீரராக ‘விக்னேஷ் விக்கி தாஸ்’ என்ற கதாபாத்திரத்தில் நடித்துள்ள ஆண்டனி வர்கீஸ் தமக்குக் கொடுக்கப்பட்ட எல்லையை உணர்ந்து ஓரளவிற்குத் திருப்திகரமான கச்சிதமான நடிப்பை வெளிப்படுத்தியுள்ளார்.

கிரிக்கெட் சூதாட்டப் போட்டிகளில் ஈடுபடும் அணியின் கேப்டன் கதாபாத்திரத்தில் வரும் நடிகர் கதிருக்கு, இப்படத்தில் பெரிதாக நடிக்க வாய்ப்பில்லை என்றாலும், தனது பங்கை ஓரளவிற்குப் பரவாயில்லை என்று சொல்லும் அளவிற்குச் செய்து முடித்துள்ளார். மறுபுறம், இந்தச் சூதாட்டக் கிளப்பின் மாபெரும் மெகா டானாக வரும் இயக்குநர் மிஷ்கின், தனது மிரட்டலான புதிய தோற்றம், உடல்மொழி ஆகியவற்றின் மூலம் வில்லத்தனத்தைக் காட்டி ரசிகர்களை ரசிக்க வைத்துள்ளார். இவர்களுடன் இணைந்து விக்கி தாஸின் காதலியாக வரும் சம்யுக்தா விஸ்வநாதன், துல்கர் சல்மானின் தாயாக வரும் மூத்த நடிகை ஜெயசுதா, தந்தையாக வருபவர் மற்றும் நண்பனாக வரும் வினய் ஃபோர்ட் போன்ற பலரும் தங்களது கச்சிதமான நடிப்பின் மூலம் இப்படத்தின் உணர்வுப்பூர்வமான காட்சிகளுக்குத் தகுந்த பங்களிப்பைச் செலுத்திப் படத்தின் தரத்தை உயர்த்தியுள்ளனர்.

தொழில்நுட்ப ரீதியாக, ஒளிப்பதிவாளர் ஜிம்ஷி காலித் தனது அசாத்திய கேமரா கோணங்களால் ஒட்டுமொத்தத் திரைப்படத்தையும் மிகவும் பிரம்மாண்டமான முறையில் ஒளிப்பதிவு செய்து காட்சி விருந்தளித்துள்ளார். அதேபோல், இசையமைப்பாளர் ஜேக்ஸ் பிஜாயின் அசாத்திய பாடல்களும், விறுவிறுப்பான பின்னணி இசையும் (BGM) படத்திற்கு ஒரு வியக்க வைக்கும் பிரம்மாண்டத்தையும், அடுத்தகட்ட சுவாரசியத்தையும் கூட்டியிருக்கிறது.

திரைக்கதையின் அமைப்பில், படத்தின் இரண்டாவது பாதியில் (Second Half) இருந்த சில தேவையற்ற நீளத்தைக் கொஞ்சம் குறைத்திருந்தால், படத்தின் ஒட்டுமொத்த வேகம் இன்னும் பன்மடங்கு கூடியிருக்கும் என்ற எண்ணத்தை ஏற்படுத்துகிறது. ஒட்டுமொத்தமாகப் பார்க்கும் போது, ஆரம்பத்தில் மிகவும் கலகலப்பான ஒரு கமர்சியல் திரைப்படமாகத் தொடங்கி, அடுத்தடுத்து நகரும் காட்சிகளால் விறுவிறுப்பான ஒரு மெகா கிரைம் த்ரில்லராக (Crime Thriller) மாறியுள்ள இந்த ‘ஐஆம் கேம்’ திரைப்படம், ஓகேவான திரைப்பட அனுபவமாக இருக்கும்!