ஜெய் – டெல்னா டேவிஸின் புதிய ஹாரர் காமெடி படம்!

தியாகராஜா டாக்கீஸ் (Thiagaraja Talkies) நிறுவனம் சார்பில் தயாரிப்பாளர் ஏ. எம். பிரபாகரன் தயாரிப்பில், நடிகர் ஜெய் கதையின் நாயகனாக நடிக்கும் பெயரிடப்படாத புதிய திரைப்படத்தின் படப்பிடிப்பு பூஜையுடன் தென்காசியில் தொடங்கியுள்ளது. இத்திரைப்படத்தை அறிமுக இயக்குநர் சிவ பிரசன்னா எழுதி இயக்குகிறார். தென்காசியில் நடைபெற்ற தொடக்க விழாவில் தென்காசி மாவட்ட ஆட்சியர் திரு. ரஞ்சித் சிங், IAS., சிறப்பு விருந்தினராகக் கலந்துகொண்டு கேமராவை இயக்கி வைத்தார். பிரபல தொழிலதிபர் எஸ். சாமிநாத பாண்டியன் முன்னிலையில், தயாரிப்பாளர் ஏ. எம். பிரபாகரன் கிளாப் அடித்து படப்பிடிப்பை முறைப்படி தொடங்கி வைத்தார்.

கலகலப்பான மற்றும் மர்மங்கள் நிறைந்த ஒரு முழுநீள ஹாரர் காமெடி (Horror Comedy) திரைப்படமாக இப்படம் தயாராகி வருகிறது. இதில் நடிகர் ஜெய்க்கு ஜோடியாக நடிகை டெல்னா டேவிஸ் (Delna Davis) நாயகியாக நடிக்கிறார். தென்காசி மற்றும் அதன் சுற்றுவட்டாரப் பகுதிகளில் அமைந்துள்ள இயற்கை பின்னணிகளின் இயல்பான சூழலைத் திரையில் பதிவு செய்யும் வகையில், இன்று முதல் தொடர்ந்து 23 நாட்களுக்கு இதன் முதற்கட்டப் படப்பிடிப்பு இடைவிடாது ஒரே ஷெட்யூலாக நடத்தப்பட உள்ளதாகப் படக்குழுவினர் தெரிவித்துள்ளனர். ஜெய் – சிவ பிரசன்னா கூட்டணியில் உருவாகும் இந்த விசித்திர விழிப்புணர்வு பொழுதுபோக்குக் கதைக்குத் தற்போதே திரையுலக வணிகர்களிடமும் ரசிகர்கள் மத்தியிலும் நல்ல எதிர்பார்ப்பு ஏற்பட்டுள்ளது.

விஜய் உலகநாத் இப்படத்திற்கு ஒளிப்பதிவு செய்ய, வி. ஜே. சபு ஜோசப் படத்தொகுப்புப் (Editing) பணிகளை மேற்கொள்கிறார். கலை இயக்கத்தை ஜெயச்சந்திரனும், சண்டைப் பயிற்சியை ராம் குமாரும் கவனிக்கின்றனர். மேலும் ஆடை வடிவமைப்பை அபினந்தினி M, ஒப்பனையை எஸ். ஏ. சண்முகம், மற்றும் ஸ்டில்ஸ் பணிகளை ஆனந்தன் மேற்கொள்கின்றனர். தயாரிப்பு நிர்வாகியாக ரங்கராஜ் பெருமாள், நிர்வாகத் தயாரிப்பாளராக (EP) இளங்கோ ஏகாம்பரம், மற்றும் தலைமை தயாரிப்பு நிர்வாகியாக கே. எஸ். ஹேம்ராஜ் ஆகியோர் பணியாற்றுகின்றனர்.