சூர்யா வெளியிட்ட ‘கன்னிமாடம்’ படத்தின் ஃபர்ஸ்ட் லுக்!

‘மெட்டி ஒலி’ தொலைக்காட்சித் தொடரில் நடித்து உலகப்புகழ் பெற்ற நடிகர் போஸ் வெங்கட், “கன்னி மாடம்” படத்தின் மூலமாக இயக்குனராக அறிமுகமாகியிருக்கிறார். ஸ்ரீ ராம் கதாநாயகனாகவும் காயத்ரி கதாநாயகியாகவும் அறிமுகமாகிறார்கள். இப்படத்தின் ஃபர்ஸ்ட் லுக் போஸ்டரை நடிகர் சூர்யா வெளியிட்டதில் பெரும் மகிழ்ச்சியில் இருக்கும் போஸ் வெங்கட் அது குறித்து கூறியதாவது….

“கன்னி மாடம்” படத்தின் டிசைன்ஸ் பார்ப்பதற்கு தனித்துவமாக, அனைவரையும் கவர்ந்துள்ளதில் மகிழ்ச்சி. “நல்ல உள்ளம் கொண்ட நடிகர்  சூர்யா இதில் பங்கேற்க வில்லை என்றால், இது சாத்தியப்பட்டிருக்காது. எங்களுக்கு ஆதரவாக இருந்து இப்படத்தின் ஃபர்ஸ்ட் லுக் போஸ்டர் வெளியிட்டதற்கு  நாங்கள் சூர்யாவிற்கு நன்றியை தெரிவித்துக் கொள்கிறோம்.

மக்களிடமிருந்து அமோக வரவேற்பு கிடைத்ததினால் நாங்கள் கூடுதல் மகிழ்ச்சியாக இருக்கிறோம். ‘கன்னி மாடம்’ படத்தின் பஸ்ட் லுக் போஸ்டர் மக்களிடம் சரியான முறையில் சென்றடைந்துள்ளது. அதனை கொண்டு சேர்த்த பத்திரிகை ஊடகத்தினருக்கும், சமூக வலைத்தள ஊடகத்தினருக்கும் மேலும் இதற்கு உதவிய ஒவ்வொருவருக்கும் என் நன்றியை தெரிவித்துக் கொள்கிறேன்’.

சென்னையில் நான் ஆட்டோ ஓட்டிக்கொண்டிருக்கும் போது என் வாழ்க்கையில் நடந்த மற்றும் நான் எதிர்கொண்ட உண்மை சம்பவங்களை அடிப்படையாக கொண்டு இப்படத்தின் கதையை உருவாக்கினேன். துல்லியமாக சொல்ல வேண்டுமென்றால் என் பக்கத்து வீட்டுக்காரரின் வாழ்க்கையில் நடந்த உண்மை சம்பவம் தான் இந்த “கன்னி மாடம்”.