சந்தீப் கிஷன் நடிக்கும் பிரம்மாண்ட திரைப்படம் ‘கரிகாலா’ ஆரம்பம்!

தமிழ் மற்றும் தெலுங்குத் திரையுலகில் தனக்கெனத் தனித்துவமான இடத்தைப் பிடித்துள்ள நடிகர் சந்தீப் கிஷன் நடிப்பில், பான்-இந்தியா (Pan-India) அளவில் பிரம்மாண்டமாக உருவாகவிருக்கும் புதிய திரைப்படம் ‘கரிகாலா’. சமூகக் கற்பனை (Socio-fantasy) எனும் சவாலான கதைகளத்தைக் கொண்டு தயாராகும் இத்திரைப்படத்தின் தொடக்க விழா, சினிமா உலகைச் சேர்ந்த பல முக்கியப் பிரமுகர்கள் மற்றும் பிரபலங்கள் முன்னிலையில் பாரம்பரிய பூஜை மற்றும் கோலாகலமான நிகழ்வுகளுடன் அதிகாரப்பூர்வமாகத் தொடங்கியுள்ளது. புராணக் கூறுகள், சமூகக் கருத்துக்கள், சாகசங்கள் மற்றும் கற்பனை உலகை ஒன்றிணைத்து மிக பிரம்மாண்டமான பொருட்செலவில் ஒரு மாறுபட்ட திரைக்கதையாக இயக்குநர் உகந்தர் முனி இப்படத்தை வடிவமைத்துள்ளார். இத்திரைப்படத்தை ஷைனிங் பிக்சர்ஸ் (Shining Pictures) நிறுவனத்தின் சார்பில் தயாரிப்பாளர்கள் மஹிதர் ரெட்டி மற்றும் ராஜசேகர் அன்னபிமோஜு ஆகியோர் இணைந்து தயாரிக்கின்றனர்.

பெரிய எதிர்பார்ப்புகளுக்கு மத்தியில் உருவாகும் இத்திரைப்படத்தில் சந்தீப் கிஷனுக்கு ஜோடியாக கேத்ரின் தெரசா, சாக்ஷி மடோல்கர் மற்றும் காயத்ரி பரத்வாஜ் ஆகிய மூன்று பிரபல கதாநாயகிகள் முக்கியக் கதாபாத்திரங்களில் நடிக்க ஒப்பந்தமாகியுள்ளனர். இவர்களின் நடிப்பு படத்திற்குப் கூடுதல் பலம் சேர்க்கும் என எதிர்பார்க்கப்படுகிறது. படத்தின் முதல் நாள் படப்பிடிப்பு தயாரிப்பாளர்களின் குடும்பப் பெரியவர்கள் மற்றும் சினிமா பிரபலங்களின் வாழ்த்துகளுடன் சிறப்பாகத் தொடங்கியது. தயாரிப்பாளர் ராஜசேகரின் தாயார் சத்யவதி கேமராவை இயக்கி படப்பிடிப்பை தொடங்கி வைக்க, தயாரிப்பாளர் மஹிதர் ரெட்டியின் தாயார் பத்மா ரெட்டி முதல் காட்சிக்கான கிளாப் அடித்து நிகழ்வை சிறப்பித்தார்.

இந்த தொடக்க விழாவில் தயாரிப்பாளர் ராஜசேகர் அன்னபிமோஜுவின் தந்தை வீர பிரம்ம சாரி படத்தின் திரைக்கதை புத்தகத்தை படக்குழுவினரிடம் ஒப்படைத்தார். நடிகர் ஆதி சாய்குமார் இந்த சிறப்பு நிகழ்வில் கலந்துகொண்டு திரைப்படத்தின் முதல் காட்சியை இயக்கி படக்குழுவினருக்குத் தனது வாழ்த்துகளைத் தெரிவித்தார். அனைத்து மொழிகளிலும் உள்ள சினிமா ரசிகர்களைக் கவரும் வகையில் பான்-இந்தியா திரைப்படமாகத் தயாராகும் ‘கரிகாலா’ திரைப்படத்தின் அடுத்தகட்ட படப்பிடிப்பு மற்றும் தொழில்நுட்பக் கலைஞர்கள் குறித்த விபரங்கள் விரைவில் அதிகாரப்பூர்வமாக வெளியிடப்படும் என படக்குழுவினர் தரப்பில் தெரிவிக்கப்பட்டுள்ளது.