‘ஆவேஷம்’ படத்தின் இயக்குநர், சூர்யாவை இயக்குகிறார்!

‘ஆவேஷம்’ திரைப்படத்தை இயக்கிய, இயக்குநர் ஜித்து மாதவன் இயக்கும் திரைப்படத்தில், சூர்யா நடித்து வருகிறார். இன்னும் பெயரிடப்படாத இத்திரைப்படத்தை, ‘ழகரம் ஸ்டுடியோஸ்’ நிறுவனம் சார்பில், நடிகை ஜோதிகா தயாரித்து வருகிறார். இது நடிகர் சூர்யாவின் நடிப்பில் உருவாகும் 47 வது திரைப்படம். இப்படத்தின்,  படப்பிடிப்பு சென்னையில் இன்று பூஜையுடன் தொடங்கியது. இயக்குநர் ஜித்து மாதவன், கப்பி , ரோமாஞ்சம், ஆவேஷம், பைங்கிளி உட்பட இதுவரை நான்கு மலையாளப்படங்களை இயக்கியிருக்கிறார். இயக்குநர் ஜித்து மாதவன் சூர்யாவை இயக்குவதன் மூலம் தமிழுக்கு அறிமுகமாகிறார், என்பது குறிப்பிடத்தக்கது.

சூர்யாவின் ஜோடியாக, 14 வருடங்களுக்கு முன்னர் ‘திருமணம் எனும் நிக்கா’ படத்தில், நடிகர் ஜெய்யுடன் ஜோடியாக நடித்த நஸ்ரியா நசீம் நடித்து வருகிறார். சூர்யா, நஸ்ரியா நசீமுடன் நஸ்லென் முக்கிய கதாபாத்திரத்தில் நடிக்கிறார். இவர்களுடன் ஜான் விஜய், ஆனந்த் ராஜ் உள்ளிட்ட பலர் நடித்து வருகின்றனர்.

பூஜையுடன் தொடங்கிய இத்திரைப்பட நிகழ்வில், படத்தின் நாயகன் சூர்யா,  நாயகி நஸ்ரியா நசீம், நடிகர் நஸ்லென், நடிகர் ஆனந்த்ராஜ், இசையமைப்பாளர் சுஷின் ஷியாம் மற்றும் ‘ழகரம் ஸ்டுடியோஸ்’ தயாரிப்பாளர் ஜோதிகா, கார்த்தி, ராஜசேகர் பாண்டியன் (2D என்டர்டெயின்மென்ட்), எஸ்.ஆர். பிரகாஷ் மற்றும் எஸ்.ஆர். பிரபு (ட்ரீம் வாரியர் பிக்சர்ஸ்) உள்ளிட்ட பலர் கலந்து கொண்டனர். படத்தின் முதற்கட்டப் படப்பிடிப்பும் சென்னையில் தொடங்கி, நடை பெற்று வருகிறது.

இயக்குநர் ஜித்து மாதவன் பேசும் போது,

“புதிய திரைத்துறை, புதிய ஆரம்பம், அதுவும் சூர்யா போன்ற ஒரு பெரும் நட்சத்திரத்துடன் இணைவது, எனக்கு கூடுதல் உற்சாகத்தைத் தருகிறது. புதிதாக ஒன்றை முயற்சிக்கிறோம். நாங்கள் கொடுக்கவிருக்கும் இந்தப் புதுமையை ரசிகர்கள் ஏற்றுக்கொண்டு ரசிப்பார்கள் என்று நம்புகிறேன்,” என்றார்.

சுஷின் ஷியாம் இசையமைக்க, ஒளிப்பதிவு செய்துவருகிறார் வினீத் உண்ணி பாலோட். படத்தொகுப்பு, அஜ்மல் சாபு. கலை இயக்கம், அஸ்வினி காலே. சண்டைப்பயிற்சி, சேத்தன் டி சௌசா.