சிறுவயது அதிரச நினைவுகளைப் பகிர்ந்த நடிகை சமந்தா!

எண்டெமால் ஷைன் இந்தியா தயாரிப்பில் சோனி விழாவில் (Sony VIZHA) ஒளிபரப்பாகி வரும் ‘செலிபிரிட்டி மாஸ்டர்செஃப் தமிழ்’ (Celebrity MasterChef Tamil) சமையல் நிகழ்ச்சியின் தீபாவளி சிறப்பு எபிசோட், உணவுகளின் சுவையைத் தாண்டி பலரின் உணர்வுப்பூர்வமான சிறுவயது நினைவுகளைக் கொண்டாடும் மேடையாக மாறியுள்ளது. இந்நிகழ்ச்சியில் சிறப்பு விருந்தினராகப் பங்கேற்ற முன்னணி நடிகை சமந்தா ரூத் பிரபு, தனக்குப் பிடித்தமான தீபாவளிப் பலகாரங்களில் அதிரசமும் ஒன்று எனக் குறிப்பிட்டுள்ளார். தனது சிறுவயதில் வீட்டின் வெளியே விற்கப்படும் ஒரு ரூபாய் அதிரசத்தை வாங்குவதற்காக ஆசையோடு காசு சேமித்து, அதை ரசித்துச் சாப்பிட்ட மறக்க முடியாத நினைவுகளை அவர் நெகிழ்ச்சியுடன் பகிர்ந்துள்ளார்.

சமந்தாவின் இந்த நினைவலைகளைத் தொடர்ந்து, நிகழ்ச்சியின் நடுவரும் பிரபல சமையல் கலைஞருமான செஃப் வெங்கடேஷ் பட்டும் தனது சிறுவயது தீபாவளி நினைவுகளைப் பகிர்ந்துகொண்டார். தனக்குத் தீபாவளி என்றாலே முதலில் நினைவுக்கு வருவது பட்டாசுகளும் பாரம்பரிய உணவுகளும்தான் என்று குறிப்பிட்ட அவர், தங்கள் இல்லத்தில் தீபாவளிப் பலகாரங்கள் கார்த்திகை தீபம் திருவிழா வரை தொடர்ந்து தயாரிக்கப்படும் என்ற சுவாரசியமான தகவலைக் குறிப்பிட்டார். மேலும், பலகாரங்களில் தனக்கு மிகவும் பிடித்தவை அதிரசம் மற்றும் உலர் பழங்கள் (Dry Fruits) கலந்த மிக்ஸர் என்றும் அவர் இந்த உரையாடலின் போது தெரிவித்துள்ளார்.

இந்த தீபாவளிச் சவாலை ஏற்றுக்கொண்ட போட்டியாளர்கள் மைசூர் பாக், முறுக்கு, சோமாஸ், சீடை உள்ளிட்ட பல்வேறு தமிழ்நாட்டின் பாரம்பரியப் பலகாரங்களையும், புதுமையான சில இனிப்பு வகைகளையும் சமைத்து நடுவர்களை அசத்தினர். தீபாவளிப் பண்டிகையின் சுவையையும், அதனுடன் பிணைந்துள்ள மனிதர்களின் உணர்வுகளையும் அழகாகப் பிரதிபலிக்கும் இந்த சுவாரசியமான எபிசோடை திங்கள் முதல் வெள்ளி வரை இரவு 8 மணிக்கு சோனி விழா (Sony VIZHA) தொலைக்காட்சியிலும், ஓடிடி தளமான சோனி லிவ் (Sony LIV) செயலியிலும் எப்போது வேண்டுமானாலும் ரசிகர்கள் கண்டு ரசிக்கலாம்.