சீயான் விக்ரமை மலைக்க வைத்த மலையாள ரசிகர்கள்!

செவன் ஸ்கிரீன் ஸ்டுடியோ சார்பில் தயாரிப்பாளர் எஸ். எஸ். லலித்குமாரின் பிரம்மாண்டமான தயாரிப்பில்,  சீயான் விக்ரம் பல கெட்டப்புகளில் நடித்து, ஆகஸ்ட் 31 ஆம் தேதியன்று வெளியாக இருக்கும் திரைப்படம் ‘கோப்ரா’.  இப்படத்தினை ரசிகர்களிடம் பிரபலப்படுத்துவதற்காக சீயான் விக்ரம், ரோஷன் மேத்யூ, நடிகைகள் மியா ஜார்ஜ், மீனாட்சி கோவிந்தராஜன், மிருணாளினி ரவி படக்குழுவினர்  பல்வேறு மாநிலங்களுக்கு பயணம் மேற்கொண்டிருக்கிறார்கள். இதன் ஒரு பகுதியாக கொச்சிக்கு சென்றனர். அங்கு  சீயான் உள்ளிட்ட படக்குழுவினருக்கு பிரம்மாண்டமான வரவேற்பு அளிக்கப்பட்டது.

இயக்குநர் அஜய் ஞானமுத்து இயக்கத்தில், ஆகஸ்ட் 31ஆம் தேதி அன்று உலகம் முழுவதும் தமிழ், தெலுங்கு, மலையாளம், கன்னடம், இந்தி ஆகிய மொழிகளில் வெளியாகவிருக்கும் ‘கோப்ரா’ திரைப்படத்தை, தமிழகத்தில் உதயநிதி ஸ்டாலினின் ரெட் ஜெயண்ட் மூவிஸ் நிறுவனம் வெளியிடுகிறது.

கணித புதிர்களை  மையப்படுத்தி உருவாகி இருக்கும் ‘கோப்ரா’ திரைப்படத்தை பற்றி ரசிகர்களிடத்தில் ஆர்வத்தை தூண்டும் வகையில் திருச்சி, மதுரை, கோவை, சென்னை ஆகிய இடங்களில் ரசிகர்களை சந்தித்த கோப்ரா படக்குழுவினர், கேரள தேசத்து ரசிகர்களை சந்திக்கும் வகையில் கொச்சிக்கு பயணம் செய்தனர்.

கொச்சியில் உள்ள பிரபலமான ஜெயின் கல்லூரி வளாகத்தில் ‘கோப்ரா’ பட குழுவினர், மாணவ மாணவிகளை சந்தித்தனர். அவர்களின் கேள்விகளுக்கு படக்குழுவினர் பதிலளிக்கையில் ரசிகர்கள் உற்சாகமாகினர். தமிழக பயணத்தை போல், கேரள பயணமும் எதிர்பார்த்ததை விட கூடுதலான வெற்றி பெற்றதால் ‘கோப்ரா’ பட குழு உற்சாகமடைந்திருக்கிறது.