லார்ட்ஸ் மைதானத்தை கங்குலி பயோபிக் ‘தாதா’ படத்திற்காக மீட்டுருவாக்கம்!

இந்திய கிரிக்கெட் அணியின் முன்னாள் கேப்டனும், ரசிகர்களால் அன்போடு ‘தாதா’ என்றும் அழைக்கப்படும் சவுரவ் கங்குலியின் பிறந்தநாளை முன்னிட்டு, அவரது வாழ்க்கை வரலாற்றுத் திரைப்படமான ‘தாதா – தி சவுரவ் கங்குலி ஸ்டோரி’ (Dada – The Sourav Ganguly Story) படத்தின் அதிகாரப்பூர்வ ஃபர்ஸ்ட் லுக் போஸ்டர் இன்று வெளியிடப்பட்டுள்ளது. இத்திரைப்படத்தில் கங்குலி பாத்திரத்தில் முன்னணி பாலிவுட் நடிகர் ராஜ்குமார் ராவ் நடிக்கிறார்.

தற்போது வெளியாகியுள்ள ஃபர்ஸ்ட் லுக் போஸ்டரில், கடந்த 2002-ஆம் ஆண்டு இங்கிலாந்துக்கு எதிரான வரலாற்றுச் சிறப்புமிக்க நாட்வெஸ்ட் கோப்பை (NatWest Trophy) வெற்றிக்குப் பிறகு, லார்ட்ஸ் மைதானத்தின் பால்கனியில் நின்று சவுரவ் கங்குலி தனது சட்டையைக் கழற்றி சுழற்றி ஆக்ரோஷமாகக் கொண்டாடிய அந்த மறக்க முடியாத வரலாற்றுத் தருணத்தை நடிகர் ராஜ்குமார் ராவ் அப்படியே கண்முன் கொண்டு வந்துள்ளார். இந்திய கிரிக்கெட்டின் அச்சமற்ற புதிய சகாப்தத்தின் அடையாளமாக விளங்கும் இந்த போஸ்டர், உலகெங்கிலும் உள்ள கிரிக்கெட் ரசிகர்களிடையே பெரும் வரவேற்பைப் பெற்றுள்ளது.

விளையாட்டை வெறும் விளையாட்டாக அணுகாமல், இந்திய கிரிக்கெட்டின் போக்கையே மாற்றியமைத்த ஒரு மாபெரும் ஆளுமையின் அசாத்தியமான வாழ்க்கைப் பயணத்தை இப்படம் பேசுகிறது. ஒரு சாதாரண இளம் கிரிக்கெட் வீரராகத் தொடங்கி, இந்திய அணியின் மிகச் செல்வாக்கு மிக்க கேப்டன்களில் ஒருவராக உயர்ந்த சவுரவ் கங்குலியின் விடாமுயற்சி, அசைக்க முடியாத தன்னம்பிக்கை மற்றும் ஒரு தலைமுறையையே ஊக்குவித்த அவரது கிரிக்கெட் பாரம்பரியத்தை இத்திரைப்படம் கொண்டாடுகிறது.

ரசிகர்களிடம் பெரும் எதிர்பார்ப்பை ஏற்படுத்தியுள்ள இத்திரைப்படம், கோடை விடுமுறை வார இறுதியை முன்னிட்டு 2027, மே 14 அன்று உலகம் முழுவதும் திரையரங்குகளில் பிரம்மாண்டமாக வெளியாகவுள்ளது என படக்குழு அதிகாரப்பூர்வமாக அறிவித்துள்ளது.