வில்லனே இல்லாத ஃபேமிலி என்டர்டெய்னர் ‘ஹாய்’ –  இயக்குநர் விஷ்ணு எடவன்!

தமிழ் திரையுலகின் முன்னணி நட்சத்திர நடிகை நயன்தாரா மற்றும் நடிகர் கவின் முதன்முறையாக இணைந்து நடித்துள்ள ‘ஹாய்’ திரைப்படத்தின் வெளியீட்டுத் தேதியை படக்குழுவினர் பிரத்யேக காணொளி (Video) மூலம் அதிகாரப்பூர்வமாக அறிவித்துள்ளனர்.

அறிமுக இயக்குநர் விஷ்ணு எடவன் இயக்கத்தில், ஒரு முழுமையான ஃபேமிலி என்டர்டெய்னராகத் தயாராகி இருக்கும் இத்திரைப்படம், எதிர்வரும் ஆகஸ்ட் மாதம் 14-ஆம் தேதி முதல் உலகம் முழுவதும் உள்ள திரையரங்குகளில் வெளியாகிறது. ஏற்கனவே இப்படத்தின் பாடல் ஒன்று வெளியாகி, மில்லியன் கணக்கிலான டிஜிட்டல் பார்வைகளைப் பெற்று படத்திற்கான எதிர்பார்ப்பை இணையத்தில் பெருமளவில் எகிற வைத்துள்ளது.

இப்படம் குறித்து இயக்குநர் விஷ்ணு எடவன் பேசுகையில்,

‘ஹாய்’ திரைப்படம் அதன் பெயருக்கு ஏற்றவாறு மிகவும் எளிமையான மற்றும் இனிமையான திரைப்படமாக இருக்கும் என்று குறிப்பிட்டுள்ளார். ரசிகர்கள் தங்களது குடும்பத்துடன் இணைந்து இரண்டே கால் மணி நேரம் ஜாலியாக ரசிக்கும்படியான பொழுதுபோக்கு அம்சங்களுடன் இக்கதை தயார் செய்யப்பட்டுள்ளது. சென்னை, கோயம்புத்தூர் மற்றும் பொள்ளாச்சி ஆகிய மூன்று முக்கிய நகர பின்னணிகளில் இப்படத்தின் கதை நிகழ்கிறது.

குறிப்பாக, தமிழ் சினிமாவில் என்றும் ரசிக்கப்படும் ‘டார்லிங் டார்லிங் டார்லிங்’, ‘சந்தோஷ் சுப்பிரமணியம்’, ‘யாரடி நீ மோகினி’ ஆகிய திரைப்படங்களைப் போல, எந்தவொரு வில்லன் கதாபாத்திரமும் இல்லாத ஒரு  ஃபேமிலி என்டர்டெய்னராக இப்படம் உருவாகி இருப்பதாக இயக்குநர் உறுதியளித்துள்ளார். இப்படத்தில் நயன்தாரா மற்றும் கவினுடன் இணைந்து கே. பாக்யராஜ், பிரபு, ராதிகா சரத்குமார், வி டி வி கணேஷ், சத்யன், ‘ஆதித்யா’ கதிர், குரேஷி உள்ளிட்ட பல முன்னணி நட்சத்திரங்கள் நடித்துள்ளனர். ஜீ ஸ்டுடியோஸ், தி ரவுடி பிக்சர்ஸ் மற்றும் செவன் ஸ்கிரீன் ஸ்டுடியோ ஆகிய நிறுவனங்கள் சார்பில் தயாரிப்பாளர்கள் நயன்தாரா, விக்னேஷ் சிவன் மற்றும் எஸ். எஸ். லலித்குமார் ஆகியோர் இணைந்து இப்படத்தைப் பிரம்மாண்டமாகத் தயாரித்துள்ளனர். வினோத் சி. ஜே., கே. எஸ். மயில் வாகனன் ஆகியோர் இணை தயாரிப்பாளர்களாகவும், வி. கே. குபேந்திரன் கிரியேட்டிவ் புரொடியூசராகவும் பொறுப்பேற்றுள்ளனர்.

இயக்குநர் லோகேஷ் கனகராஜ் இயக்கத்தில் வெளியாகி மிகப்பெரிய வெற்றி பெற்ற ‘கைதி’, ‘மாஸ்டர்’, ‘விக்ரம்’ ஆகிய முன்னணி திரைப்படங்களில் உதவி இயக்குநராகப் பணியாற்றிய அனுபவமும், பிரபல பாடலாசிரியருமான விஷ்ணு எடவன் இப்படத்தின் மூலம் இயக்குநராக அறிமுகமாவது குறிப்பிடத்தக்கது. இவருடைய இயக்கத்தில் ஒரு பெரும் நட்சத்திரப் பட்டாளமே இணைந்து நடித்திருப்பதால், ‘ஹாய்’ திரைப்படத்திற்குத் திரையுலகினரிடமும், சினிமா ரசிகர்களிடமும் தற்போதே மிகப்பெரிய எதிர்பார்ப்பு ஏற்பட்டுள்ளது.

இப்படத்திற்கு ஜென் மார்ட்டின் இசையமைக்க, ராஜேஷ் சுக்லா ஒளிப்பதிவு செய்துள்ளார். மேலும், படத்தொகுப்பு பணிகளை பிலோமின் ராஜும், கலை இயக்கத்தை எஸ். கண்ணனும் கவனித்துள்ளனர். முன்னணி நட்சத்திரங்களின் கூட்டணி மற்றும் வலுவான தொழில்நுட்பக் கலைஞர்களின் உழைப்பில் உருவாகியுள்ள ‘ஹாய்’ திரைப்படம் ஆகஸ்ட் 14 சுதந்திர தின வார இறுதியில் திரையரங்குகளைக் கலக்கத் தயாராகி வருகிறது.