Connect with us

Reviews

சிலுக்குவார்ப்பட்டி சிங்கம்  – விமர்சனம்

Published

on

அரசியல்வாதி ஒருவரின் சிபாரிசில் சிலுக்குவார்ப்பட்டி போலீஸ் ஸ்டேசனில் சாதாரண  கான்ஸ்டபிளாக பணியாற்றுகிறார் கதையின் நாயகனான விஷ்ணு விஷால். இவருடைய கேரக்டரை அறிமுக இயக்குநரான செல்லா அய்யாவு, சிறிது உதார் போலீஸாகவும், சிறிது கெத்து போலீஸாகவும், சிறிது சிரிப்பு போலீஸாகவும் என கலந்து உருவாக்கியிருக்கிறார்.

இவர் ஆக்சனில் இறங்கவேண்டும் என்றால் அதற்கு ஒரு சிறப்பான பின்னணியை இயக்குநர் வடிவமைத்திருக்கிறார். அது முழுக்க முழுக்க காமெடியாக இருக்கிறது. அதாவது ஹீரோ விஷ்ணு விஷால் ஓசியில் ஆஃப் பாயிலை விரும்பி ரசித்து சாப்பிடுவார். அதை யாராவது தடுத்து தட்டிவிட்டால்….அவ்வளவுதான்.அவருக்கு கோபம் தலைகேறும். அதற்கு காரணமானவர்கள் யாராக இருந்தாலும் ஆக்சனில் இறங்கி துவம்சம் விடுவார். அவரின் இந்த பழக்கம் அவரை ஒரு சிக்கலில் மாட்டிவிடுகிறது. அதிலிருந்து தப்பித்தாரா?இல்லையா? என்பதை முடிந்த அளவிற்கு காமெடியாக கொடுக்க முயன்றிருக்கிறார்கள்.

படத்தின் நாயகி ரெஜினா, நாயகன் விஷ்ணு விஷாலுக்கு முறைபொண்ணு. சிறிய வயதிலேயே இருவரும் காதலிக்கிறார்கள். இதனால் ரெஜினாவின் தந்தையார் அவரை வேறு ஊருக்கு சென்று படிக்க வைக்கிறார். அவரும் படித்து முடித்துவிட்டு ஆசிரியையாக சிலுக்குவார்ப்பட்டிக்கு அருகேயுள்ள ஒரு பள்ளிகூடத்தில் ஆசிரியையாக பணியில் சேர்கிறார்.இதனால் மீண்டும் முறைமாமனான விஷ்ணு விஷாலைச் சந்தித்து காதலை தொடர்கிறார். வழக்கம் போல் அப்பா ரூபத்தில் சோதனை வருகிறது.அதனை நாயகன், காலங்காலமாக ஹீரோக்கள் கடைபிடிக்கும் ஸ்டைலில் எதிர்கொள்கிறார்.

திரைக்கதை வழக்கமான ஃபார்முலாவில் தயாராகியிருக்கிறது.சென்னையில் பல கொலைகளை அசால்ட்டாக செய்கிறார் சைக்கிள் சங்கர்.அதுவும் எப்படியென்றால், இவரை என்கவுண்டரில் போட்டுத்தள்ள திட்டமிடும் போலீஸ்அதிகாரியையே பொது இடத்தில் பரபரப்பான போக்குவரத்து சிக்னல் ஒன்றில் வைத்து கொலை செய்கிறார். கொல்லப்பட்டது போலீஸ் என்பதால் போலீஸ் அவனை பன்னிரண்டு தனிப்படைகளைப்போட்டு தேடுகிறது.

இதையறிந்த சைக்கிள் சங்கர் தன் கெட்டப்பை மாற்றிக் கொண்டு, புதுச்சேரியில் தலைமறைவு வாழ்க்கை நடத்துகிறார். பிறகு இவர் முன்னாள் அமைச்சர் ஒருவரை கொலை செய்வதற்காக சிலுக்குவார்பட்டிக்கு செல்கிறார். அங்கு கொலை செய்வதற்கு முன் பாரில் தண்ணியடிக்கும் போது எதிர்பாராதவிதமாக ( ஆஃப்பாயில் மேட்டருக்காக ) விஷ்ணு விஷாலுடன் மோதுகிறார். இயல்பாகவே ரௌடி என்றால் சற்று தள்ளிச்சென்று, வெள்ளைக் கொடியுடன் இருக்கும் விஷ்ணு விஷால்,சைக்கிள் சங்கரை ரௌடி என்று தெரியாததால், அவரை கைது செய்து, லாக்கப்பில் தள்ளுகிறார்.

தங்களது பாஸை காணாமல் தேடும் யோகி பாபு கூட்டணி, இறுதியில் சைக்கிள் சங்கர் சிலுக்குவார்பட்டி போலீஸ் ஸ்டேசனின் லாக்கப்பில் இருக்கிறார் என்பதை அறிந்து அவரை தப்பிக்க வைக்கிறார்கள்.அப்போது சைக்கிள் சங்கர், தன்னை கைது செய்த விஷ்ணு விஷாலை போட்டு தள்ளாமல் ஊரை விட்டு போகமாட்டேன் என்று சபதம் எடுக்கிறார்.

இதனிடையே விஷ்ணுவிஷால் ரெஜினா காதலுக்கு சிக்கலும், நெருக்கடியும் வருகிறது.இதனை எப்படி விஷ்ணுவிஷால் சமாளித்து ரெஜினாவின் கரத்தைப்பிடித்தார் என்பதை வயிறுவலிக்க சிரிக்க வைத்து சொல்லியிருக்கிறார் இயக்குநர்.

தன்னுடைய ஃபேவரைட்டான ஒன்லைன் பஞ்ச் வசனத்தால் படத்தையும், ஆடியன்சையும் காப்பாற்றுகிறார் ‘நகைச்சுவை சூறாவளி’ யோகி பாபு.ரெஜினா கவர்ச்சி காட்டி நடித்திருக்கிறார்.

ஓவியாவை, ஒப்புக்காக ஊறுகாய் அளவிற்கு யூஸ் பண்ணியிருக்கிறார்கள். கருணாகரன் மைண்ட் வாய்ஸில் டயலாக் பேசுவதால் ஆடியன்ஸிடம் ரியாக்ஷனேயில்லை.எரிச்சலும் வருகிறது.

ஆனந்த் ராஜ், பாட்ஷா படத்தின் பார்ட் 2 வை தன்னுடைய பிளாஷ் பேக்காக சொல்வது நல்ல கற்பனை.ஆனால் ஹியூமர் மிஸ்ஸிங். ஒரேயொரு பாடல் மட்டும் கேட்க இனிமையாக இருக்கிறது.

Advertisement

Review

‘வனம்’ : விமர்சனம்.

Published

on

By

‘கோல்டன் ஸ்டார் புரொடக்ஷன்ஸ் பிரைவேட் லிமிடெட்’ சார்பில் கிரேஸ் ஜெயந்தி ராணி, ஜே. பி அமலன், ஜே.பி அலெக்ஸ் ஆகியோர் இணைந்து தயாரித்துள்ள படம் ‘வனம்’.இப்படத்தினை  ஸ்ரீகண்டன் ஆனந்த் இயக்கியுள்ளார்.

‘8 தோட்டாக்கள்’, ‘ஜீவி’, போன்ற படங்களில் வெற்றி மற்றும் ஸ்மிருதி வெங்கட், அனு சித்தாரா, வேல ராமமூர்த்தி ஆகியோர் நடித்துள்ளனர்.

ஒளிப்பதிவு: விக்ரம் மோகன், இசை: ரான் ஈத்தன் யோஹான், எடிட்டிங் : பிரகாஷ் மப்பு.

‘மறுபிறவி’ மற்றும் அதனை சார்ந்த அமானுஷ்யமான விஷயத்தை மைய்யப்படுத்தி உருவாகியிருக்கும் ‘வனம்’  எப்படியிருக்கிறது? பார்க்கலாம்.

வெற்றி, ஓவிய கல்லூரி ஒன்றில் முதலாம் ஆண்டு மாணவராக ஓவியம் பயில்கிறார். அக்கல்லூரியின் விடுதியில் தன்னுடன் பயிலும் இரண்டு மாணவர்களுடன் தங்குகிறார். அப்போது இரண்டு மாணவர்களும் ஒருவருக்கு பின் ஒருவராக தற்கொலை செய்துகொள்கிறார்கள். இது அவருக்கு சந்தேகத்தையும், பயத்தையும் உண்டாக்குகிறது.

இதனிடையில் இந்த கல்லூரி பற்றிய ஆவணப்படத்தை உருவாக்கும் முயற்சியில் ஆவணப்பட இயக்குனரான நாயகி ஸ்மிருதி வெங்கட் இந்த கல்லூரிக்கு வருகிறார். இருவரும் இணைந்து விடுதி அறையில் தங்கி, உயிரிழந்த இரண்டு மாணவர்களின் தற்கொலைக்கான காரணங்களையும்  அதன் பின்னணியையும் கண்டறிய முற்படுகிறார்கள்.

அதன்பிறகு என்ன நடைபெறுகிறது? என்பதே ‘வனம்’ படத்தின் சஸ்பென்ஸ், திரில்லர் திரைக்கதை மற்றும் க்ளைமாக்ஸ்.

ஒளிப்பதிவாளர், கலை இயக்குநர், இசையமைப்பாளர், இயக்குநர் ஆகியோரின் கூட்டணி அழகியலை சார்ந்தே இருப்பதால் படத்தின் முதல் பகுதி மெதுவாக நகர்கிறது.

சைக்கோ ஜமீனாக நடித்திருக்கும் எழுத்தாளரும், நடிகருமான வேல ராமமூர்த்தி, அந்த வேடத்திற்கு பொருத்தமானவராக இருக்கிறார். கதாநாயகி ஸ்மிருதி வெங்கட், கதையின் நாயகி அனு சித்தாரா இருவரும் இயக்குநர் என்ன சொன்னாரோ அதை மட்டுமே செய்துள்ளனர்.

தன்னை கொடுங்கொலை செய்தவரை பழிவாங்க மறுஜென்மம் எடுக்கும் நபர், அவரை விட்டுவிட்டு மற்றவர்களை கொல்லத்துடிப்பது ஏன்? அழகம்பெருமாள் கதாபாத்திரத்தினை வடிவமைத்து போல் இல்லாமல் வெற்றியின் கதாபாத்திரம் சரியாக வடிவமைக்கப்படவில்லை என்பது படத்தின் பெரும் பின்னடைவு.

அவர் நாயகன் வெற்றியை கொல்லாமல் மற்றவர்களை கொல்வது ஏன்?

ஒளிப்பதிவு மற்றும் கிராபிக்ஸ் காட்சிகளில் காட்டியிருக்கும் நேர்த்தியை திரைக்கதையிலும், கதாபாத்திர வடிவமைப்பிலும் காட்டியிருந்தால் ‘வனம்’ வனப்புடன் இருந்திருக்கும்.

Continue Reading

Review

‘மாநாடு’ : விமர்சனம்!

Published

on

By

‘வி ஹவுஸ் புரடக்‌ஷன்’ சார்பில் சுரேஷ் காமாட்சி தயாரித்துள்ள படம்,’மாநாடு’. இயக்குனர் வெங்கட் பிரபு இயக்கியிருக்கும் இந்தப்படத்தில் சிலம்பரசன், எஸ்.ஜே.சூர்யா, கல்யாணி, எஸ்.ஏ.சி, வாகை சந்திரசேகர், ஒய்.ஜி.மஹேந்திரன், பிரேம்ஜி, கருணாகரன் ஆகியோர் நடித்துள்ளனர்.

தயாரிப்பாளர் சுரேஷ் காமாட்சி, வெங்கட் பிரபு சிலம்பரசன் மூவரும் முதன்முதலில் இணைந்ததால் ‘மாநாடு’ ஆரம்பக்கட்ட தயாரிப்பு நிலையிலேயே ரசிகர்களிடையே மிகப்பெரிய எதிர்பார்ப்பினை உருவாக்கியிருந்தது. அந்த எதிர்பார்ப்பினை பூர்த்தி செய்திருக்கிறதா? பார்க்கலாம்.

‘மாநாடு’ படத்தின் கதை, பல படங்களில் நாம் பார்த்தது தான். ஆனால் ‘அறிவியல் புனைவு’ திரைக்கதை, இந்திய சினிமாவுக்கு முற்றிலும் புதியது. இனி கதைக்கு வருவோம்.

சிலம்பரசன் தன்னுடைய வாழ்நாளில் ஒரு குறிப்பிட்ட நேரத்தில் மறுபடியும், மறுபடியும் வாழக்கூடிய ‘டைம் லூப்’னில் மாட்டிக்கொள்கிறார். அதாவது எத்தனை முறை இறந்தாலும் மீண்டும் உயிர் பெற்று அதே சூழ்நிலையில் வாழும் சக்தி கொண்டவர். இந்த சூழ்நிலையில் எஸ்.ஜே.சூர்யா முதலமைச்சர் எஸ்.ஏ.சந்திரசேகரை கொல்லுமாறு சிலம்பரசனை நிர்பந்திக்கிறார். இதன் பிறகு நடக்கும் விறுவிறுப்பான, பரபரப்பான சம்பவங்கள் தான், படத்தின் திரைக்கதை மற்றும் க்ளைமாக்ஸ்!

பிரதான கதாபாத்திரங்களான சிலம்பரசன் – எஸ்.ஜே.சூர்யா இருவரின் கதாபாத்திரங்கள் வடிவமைக்கப்பட்ட விதம், ”மாநாடு’ படத்தின் வெற்றிக்கான மிகப்பெரிய பலம். நீயா நானா பார்த்திடலாம் வா டா! என மோதிக்கொள்வது சுவாரஸ்யம். வெங்கட் பிரபுவின் ‘பிர்லியண்ட் ஸ்கிரீன் ப்ளே’ ஒவ்வொரு காட்சியினையும் பரபரக்க வைக்கிறது. படத்தின் முதல் பாதியை விட இரண்டாம் பாதி இன்னும் சூப்பர்.

சிலம்பரசனும், எஸ்.ஜே.சூர்யாவும் நடிக்கும் ஒவ்வொரு காட்சியினையும் சுவாரஸ்யப் படுத்தியிருக்கிறார்கள்.

இவர்களை போலவே சின்ன சின்ன கதாபாத்திரங்களில் நடித்த கல்யாணி, எஸ்.ஏ.சி, ஒய்.ஜி.மஹேந்திரன், வாகை சந்திரசேகர், பிரேம்ஜி, கருணாகரன் ஆகியோர் கதாபாத்திரங்களுக்கு சிறப்பு சேர்த்து இருக்கின்றனர்.

ஒளிப்பதிவாளர் ரிச்சர்ட்  எம் நாதனினி ஒளிப்பதிவு, யுவனின் பின்னணி இசை, எடிட்டர் கே.எல்.பிரவினின் ‘எடிட்டிங்’ஆகியன,  படத்திற்கு மிக முக்கியமான பங்கு வகித்துள்ளது.

மொத்தத்தில் ‘மாநாடு’ ஒரு விறுவிறுப்பான மாஸ் கமர்ஷியல் எண்டர்டெயினர்.

Continue Reading

Cinema News

‘சபாபதி’ : விமர்சனம்.

Published

on

By

‘சபாபதி’ படத்தில் ‘திக்குவாய்’ அப்பாவி இளைஞர் கதாபாத்திரத்தில் சந்தானம் நடித்திருக்கிறார். அவருக்கு ஜோடியாக பிரீத்தி வர்மா நடித்திருக்க, இவர்களுடன் எம்.எஸ்.பாஸ்கர், ஷாயாஜி ஷிண்டே, வம்சி, மயில்சாமி, லொல்லு சபா சாமிநாதன், மாறன், ‘குக்கூ வித் கோமாளி’ புகழ்,  உள்ளிட்ட பலர் நடித்துள்ளனர்.

RK Entertainment சார்பில் ரமேஷ்குமார் தயாரித்துள்ள இந்தப்படத்தினை ஶ்ரீனிவாசராவ் இயக்கியிருக்கிறார்.

சந்தானம் நடித்து இதுவரை வெளிவந்த டகால்ட்டி, பிஸ்கோத், பாரிஸ் ஜெயராஜ், டிக்கிலோனா ஆகிய படங்கள் ரசிகர்களை பெரிதாக கவராத நிலையில் தற்போது வெளியாகியுள்ள ‘சபாபதி’ ரசிகர்களை கவர்ந்துள்ளதா, இல்லையா?

சிறுவயது முதலே ‘திக்குவாய்’ பிரச்சனை காரணமாக பலராலும் அவமானப் படுத்தப்படுகிறார் சந்தானம். அவருக்கு பெரிய ஆறுதலாக இருப்பவர் ப்ரீத்தி வர்மா. நெருங்கிய நண்பர்களான இருவரும் எதிரெதிர் வீடுகளில் வசிக்கின்றனர். சந்தானம் அவரையே கல்யாணம் செய்து கொள்ள நினைக்கிறார். ஆனால் வேலை கிடைத்தால் தான் கல்யாணம் நடக்கும் என்ற சூழ்நிலை. இதன் பிறகு என்ன நடந்தது? என்பது தான் ‘சபாபதி’ படத்தின் கதை.

‘சபாபதி’ கதாபாத்திரத்திற்கேற்ற அருமையான பாடி லாங்குவேஜ். சந்தானம், மிகச்சிறப்பாக நடித்திருக்கிறார். வெகுளித்தனமாக அவர் செய்யும் செயல்கள் பரிதாபம் ஏற்படுத்துகிறது. இது ஒன்று மட்டுமே படத்தில் சிறப்பு. மற்றபடி எல்லாமே சுத்த பேத்தல்!

சந்தானத்தின் அப்பாவாக ‘கணபதி வாத்தியார்’ என்ற கதாபத்திரத்தில் எம்.எஸ்.பாஸ்கர் நடித்திருக்கிறார். இயக்குனருக்கு ‘கணபதி வாத்தியார்’ மேல் என்ன கோபமோ? சந்தானத்தின் உதவியோடு அவர் தலையில் வாந்தி எடுக்கவைத்தும், வாயில் மூத்திரம் அடிக்க வைத்தும் கேவலபடுத்தியிருக்கிறார்!!

ஷாயாஜி ஷிண்டே, வம்சி, மயில்சாமி, லொல்லு சபா சாமிநாதன், மாறன், ‘குக்கூ வித் கோமாளி’ புகழ்,  ரமா என படத்தில் நடித்தவர்கள் அனைவரும்  இயக்குனர் என்ன சொன்னாரோ அதை செய்திருப்பதாகவே தெரிகிறது.

ஒளிப்பதிவாளர் பாஸ்கர் ஆறுமுகம், இசையமைப்பாளர் சாம் சி.எஸ் கூட்டணியில் ‘மயக்காதே மாயக் கண்ணா’ பாடல் அருமை. பார்க்கவும், கேட்கவும் சுகமாக இருக்கிறது.

வாந்தி எடுப்பது, வாயில் மூத்திரம் அடிப்பது, காதலியின் அம்மாவை டிக்கியில் எட்டி உதைப்பது இவையெல்லாம் தான் காமெடி என நினைத்து படமாக்கியிருக்கிறார், இயக்குநர் சீனிவாச ராவ்.

மொத்தத்தில், ‘சபாபதி’ சந்தானத்தின் நடிப்பில் வேளியாகியுள்ள இன்னொரு தோல்விப் படம்.

Continue Reading

Copyright © 2021 Chennai Editor. Designed by Trendsz Up.