ஆஸ்கார் தயாரிப்பாளர்களுடன் உலக மேடைக்குச் செல்லும் கார்த்திக் சுப்பராஜின் ‘டோரதி’

இயக்குநர் கார்த்திக் சுப்பராஜ் மற்றும் இசைஞானி இளையராஜா முதன்முறையாகக் கைகோர்த்துள்ள ‘டோரதி’ திரைப்படம் அறிவிக்கப்பட்ட நாள் முதலே ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. தற்போது இப்படத்தில் இருந்து வெளியாகியிருக்கும் “கல்யாண விருந்து…” மற்றும் “முத்துமணி..” ஆகிய இரண்டு பாடல்களும் இணையதளங்களில் மிகப்பெரிய வரவேற்பைப் பெற்றுள்ளன. இந்த இரு பாடல்களும் அனைத்து சமூக வலைதளங்களில் மட்டுமின்றி, குடும்ப விசேஷங்களிலும் ஒலிக்கும் அளவிற்கு மிகப்பெரிய ஹிட்டாகி படத்தின் மீதான எதிர்பார்ப்பைப் பல மடங்கு அதிகரித்துள்ளது.

திரையுலகில் இதுவரை யாரும் செய்திராத ஒரு புதிய முயற்சியாக, ‘டோரதி’ படத்தின் பின்னணி இசைத் தொகுப்பை (Original Soundtrack – OST) படம் திரையரங்குகளில் வெளியாவதற்கு முன்பாகவே கார்த்திக் சுப்பராஜ் மற்றும் இளையராஜா கூட்டணி டிஜிட்டல் தளங்களிலும், வினைல் ரெக்கார்டிலும் (Vinyl Record) வெளியிட்டுள்ளது. இதற்காக செப்டம்பர் 5 ஆம் தேதி சென்னையில் பிரமாண்டமான இசை நிகழ்ச்சி ஒன்று நடத்தப்பட்டது.

இதுகுறித்து இயக்குநர் கார்த்திக் சுப்பராஜ் பேசுகையில்,

“இளையராஜா சார் படத்தை முழுமையாகப் பார்த்து முடித்த உடனே, ‘இந்தப் படத்தின் ஒரிஜினல் சவுண்ட் ட்ராக்கை படம் ரிலீஸாவதற்கு முன்பாகவே நேரடியாக வெளியிடலாம்’ என்று அவராகவே இந்த ஐடியாவைக் கொடுத்தார். இந்த இசை விழா மொத்தம் 40 நிமிடங்கள் ஒலிக்கக் கூடிய ஒரு பிரம்மாண்ட நிகழ்வாக இருக்கும். ஒரு சிம்பொனி கச்சேரி போல, படத்தின் பின்னணி இசையை இளையராஜா சார் நேரடியாக மேடையில் லைவாக இசைக்க இருக்கிறார். இதை ராஜா சாரின் இசையை அனுபவிக்கும் திருவிழாவாக ரசிகர்கள் கொண்டாட வேண்டும்” என்றார்.

இயக்குநர் கார்த்திக் சுப்பராஜ் மேலும் பேசுகையில்,

“இது மதுரை சார்ந்த கதை, மதுரையில் நான் வாழ்ந்த வாழ்வியல் மற்றும் நான் பார்த்த மனிதர்களை மையமாகக் கொண்டு எழுதப்பட்ட கற்பனை கதை. சிறு வயதில் இருந்தே நண்பர்களாக இருக்கும் இரண்டு இளைஞர்கள், அவர்கள் வாழ்க்கையில் வரும் ஒரு பெண், அதன் பிறகு அவர்கள் வாழ்க்கை என்னானது? என்ற ரீதியில் தான் இதன் திரைக்கதை அமைக்கப்பட்டிருக்கிறது.

இந்தத் திரைப்படத்தை நான் எப்போதோ எடுத்திருக்க வேண்டியது. ‘மகான்’, ‘ஜிகர்தண்டா டபுள் எக்ஸ்’ மற்றும் சூர்யா சாருடன் படம் என அடுத்தடுத்து பிஸியானதால் தள்ளிப்போனது. இப்போது பண்ணவில்லை என்றால் எப்போதும் பண்ண முடியாமல் போய்விடும் என்று புரிந்துவிட்டதால், உடனே படப்பிடிப்பைத் தொடங்கிவிட்டேன்” என்று விளக்கமளித்தார்.

மேலும் “கதை எழுதும் போதே உலகளவிலான ‘பிக் 5’ சர்வதேச திரைப்பட விழாக்களில் ஒன்றில் நம் படம் திரையிடப்பட வேண்டும் என நினைத்தேன். எனக்கு இது முதல் अनुभवம் என்றாலும், இப்படத்தின் தயாரிப்பாளர்களான ஆஸ்கார் விருது பெற்ற குனித் மோங்கா குழுவினருக்கு இதில் நிறைய அனுபவம் இருக்கிறது. அவர்கள் முயற்சியால் படம் அனுப்பப்பட்டு, உலக பிரீமியர் காட்சிக்குத் தேர்வானது. திரைப்பட விழாவில் பங்கேற்பதால் இது அவார்டு படம் என்று நினைக்க வேண்டாம். நமது மக்களுக்குத் தேவையான அனைத்து கமர்சியல் அம்சங்களும், தியேட்டர் கொண்டாட்டங்களும், பாடல்களும் நிறைந்த பக்கா கமர்சியல் படமாக இது இருக்கும். அதே சமயம், நமது கலாச்சாரத்தை உலகளவில் எடுத்துச் செல்லும்” என்றார்.

இத்திரைப்படத்தை ஷிக்யா எண்டர்டெயின்மெண்ட், தம்மம் பிலிம்ஸ் மற்றும் ஜியோ ஸ்டுியோஸ் ஆகிய நிறுவனங்கள் சார்பில் குனித் மோங்கா கபூர், அச்சின் ஜெயின், ஜோதி தேஷ்பாண்டே ஆகியோர் இணைந்து தயாரித்துள்ளனர். இப்படத்தின் கதையை கார்த்திக் சுப்பராஜ் மற்றும் சரவணன் சந்திரன் எழுத, கார்த்திக் சுப்பராஜ் திரைக்கதை எழுதி இயக்கியுள்ளார். தமிழ் சினிமாவின் முன்னணி ஒளிப்பதிவாளர் திரு இப்படத்திற்கு ஒளிப்பதிவு செய்ய, கணேஷ் சிவா படத்தொகுப்புப் பணிகளை மேற்கொண்டுள்ளார்.

நடிகர்கள் தேர்வு குறித்து அவர் பேசுகையில்,

“இரண்டு கதாபாத்திரங்களில் ஒன்றில் சனத் நடிப்பது கதை எழுதும் போதே முடிவாகிவிட்டது. மற்றொரு கதாபாத்திரத்திற்குப் பலரை ஆடிசன் செய்த போது ரிஷிகாந்த் வந்தார், அவரது ஆடிசனை பார்த்து அவரைத் தேர்வு செய்தோம். இப்போது இவர்கள் இரண்டு பேரின் நடிப்பையும் பார்த்தால், இந்த கதாபாத்திரங்களுக்கு இவர்களைத் தவிர வேறு யாரும் பொருத்தமாக இருக்க மாட்டார்கள் என்று தோன்றுகிறது.

நடிகர் ரிஷிகாந்த் பேசியதாவது..,

“கார்த்திக் சுப்பராஜ் அண்ணன் படத்தில் நடிப்பதே நான் கற்பனை கூட செய்து பார்க்க முடியாத ஒன்று. அதிலும் இசைஞானி இளையராஜா சாரின் இசை மற்றும் அவரது பாடல்களுக்கு நான் திரையில் நடித்திருப்பது ஒரு மேஜிக்கல் அனுபவமாக இருக்கிறது” என்றார். தொடர்ந்து பேசிய நடிகர் சனத், “எனக்கு, ரிஷிகாந்த் மற்றும் கார்த்திக் அண்ணன் ஆகிய மூன்று பேருக்குமே இந்தத் திரைப்படம் மிகவும் முக்கியமான மைல்கல் படம். எனவே, படம் வெளியான பிறகு மக்கள் பார்த்துவிட்டுப் பேசினால் இன்னும் நன்றாக இருக்கும்” என்றார்.

வரும் செப்டம்பர் 11 ஆம் தேதி டொரொண்டோ சர்வதேச திரைப்பட விழாவில் திரையிடப்படும் ‘டோரதி’ திரைப்படம், தொடர்ந்து செப்டம்பர் 25 ஆம் தேதி உலகம் முழுவதும் திரையரங்குகளில் பிரம்மாண்டமாக வெளியாகிறது.