‘நேசிப்பாயா’ விறுவிறுப்பான ரொமான்டிக் டிராமா! – இயக்குநர் விஷ்ணுவர்த்தன்

குறும்பு படத்தின் மூலம் திரையுலகிற்கு இயக்குநராக அறிமுகமானவர் விஷ்ணுவர்த்தன். அதன் பிறகு கவனிக்கத்தக்க படங்களை இயக்கியவர், அஜித் நடிப்பில் வெளியான பில்லா, ஆரம்பம் படங்களைத் தொடர்ந்து ரசிகர்களுக்கு நன்கு பரிச்சயமானவராக இருந்து வருகிறார்.

இயக்குநர் விஷ்ணுவர்த்தன் தற்போது, நடிகர் முரளியின் இளைய மகனும், அதர்வா முரளியின் தம்பியுமான ஆகாஷ் முரளி,  நாயகனாக அறிமுகமாகும் ‘நேசிப்பாயா’ திரைப்படத்தினை இயக்கி வருகிறார்.

நேசிப்பாயா திரைப்படத்தில் நடிகர் ஆகாஷ் முரளிக்கு ஜோடியாக அதிதி ஷங்கர் நடித்திருக்க இவர்களுடன் பிரபு, சரத்குமார், குஷ்பு, கல்கி கொச்சலின் உள்ளிட்ட பலர் நடித்துள்ளனர்.

நேசிப்பாயா திரைப்படம் குறித்து இயக்குநர் விஷ்ணுவர்த்தன் கூறியதாவது…

‘‘ஷெர்ஷா’ ஹிந்தி படம் இயக்கிக் கொண்டிருந்தபோது படத்தின் டப்பிங் பணிகளில் நான் பிஸியாக இருந்த போது, என்னை ஆகாஷ் முரளி என்னை சந்தித்தார். அந்த சந்திப்பின் போது எங்கள் இருவருக்குமான நட்பு அதிகமானது. அதன் பிறகு அவரை வைத்து படம் இயக்க வேண்டும் என நினைத்தேன். அதன் பிறகு உருவானது தான் ‘நேசிப்பாயா’.

நேசிப்பாயா ஒரு நல்ல ரொமான்டிக் டிராமா. இளைஞர்களுக்கான படம் விறுவிறுப்பான திரைக்கதை அமைத்திருக்கிறேன். நல்ல என்டர்டெயின்மென்டாக இருக்கும். ஆகாஷ் முரளி இந்தப்படத்தின் கதைக்கு தக்கவாறு இருக்கிறார். ஒரு ஆக்‌ஷன் படத்திற்கான ஹீரோவாக இருக்கிறார். அது அவருடைய கூடுதல் பலம். எதிர்காலத்தில் ஒரு ஆக்‌ஷன் படம் பண்ண வாய்ப்பிருந்தால் நிச்சயமாக பண்ணுவேன்.

நேசிப்பாயா 90 சதவிகிதம் போர்ச்சுக்கல் நாட்டில் படமாக்கப்பட்டிருக்கிறது. கதைக்காக மட்டுமே இந்த நாட்டை தேர்ந்தெடுத்தேன். சினிமாவில் இதுவரை யாரும் இந்த நாட்டை அதிகமாக காட்டியிருக்க மாட்டார்கள்.

பிரிட்டிஷ் ஒளிப்பதிவாளரான கேமரோன் பிரைசன், ஒளிப்பதிவு செய்திருக்கிறார். ஸ்பெயின் நாட்டைச் சேர்ந்த ஃபெடரிகோ கியூவா சண்டைக்காட்சிகளை அமைத்திருக்கிறார்.

கல்கி கோச்சலின்  முக்கியமான கதாபாத்திரத்தில் நடித்திருக்கிறார். அவருக்காக எழுதப்பட்ட கதாபாத்திரம்.

நாயகியாக நடித்திருக்கும் அதிதி ஷங்கர், சினிமாத்தனம் இல்லாத ஒரு பெண். அது இந்த கதாபாத்திரத்திற்கு தேவைப்பட்டதால். அவரை நாயகியாக நடிக்க வைத்தேன்.” என்றார்.

நாயகன் ஆகாஷ் முரளி கூறியதாவது.,

‘அறிந்தும் அறியாமலும்’ படம் போன்ற ஒரு படத்தின் மூலம் அறிமுகமாக வேண்டும் என்று ஆசைப்பட்டேன், ஆனால், என்னை வைத்து விஷ்ணு சார் படம் பண்ணுவாரா? என்பது கேள்விக்குறியாக இருந்தது. அவரை ஒரு முறை சந்தித்தேன். அப்படியே எங்கள் நட்பு வளர்ந்தது. அவருடைய இயக்கத்தில் நடிப்பதற்கு ஆவலாக இருப்பதாக கூறினேன். அதன் பிறகு உருவானது தான், நேசிப்பாயா. ‘ என்றார்.

எக்ஸ்.பி பிலிம் கிரியேட்டர்ஸ் நிறுவனம் சார்பில் டாக்டர்.எஸ்.சேவியர் பிரிட்டோ தயாரித்திருக்கும் நேசிப்பாயா திரைப்படத்தின் இணைத் தயாரிப்பாளராக சினேகா பிரிட்டோ பணியாற்றியுள்ளார்.