நவீன் சந்திரா நடிக்கும் 51-வது புதிய திரைப்படத்தின் படப்பிடிப்பு நிறைவு!

திரையுலகில் இயக்குநர், தயாரிப்பாளர், டப்பிங் இயக்குநர் எனப் பல்வேறு பரிமாணங்களில் முத்திரை பதித்து வரும் ஆர்.பி. பாலா, முன்னணி ஒளிப்பதிவாளர் பி.ஜி. முத்தையாவுடன் இணைந்து ஒரு புதிய திரைப்படத்தைத் தயாரித்து வருகிறார். ஆர்.பி. பாலா பிலிம்ஸ் மற்றும் பி.ஜி. முத்தையா புரொடக்ஷன்ஸ் ஆகிய பேனர்களில் பிரம்மாண்டமாகத் தயாராகி வரும் இத்திரைப்படத்தில், சமீபத்தில் வெளியான ‘லெவன்’ திரைப்படத்தில் தனது சிறப்பான நடிப்பிற்காகப் பரவலான பாராட்டுகளைக் குவித்த நடிகர் நவீன் சந்திரா முதன்மை வேடத்தில் நடிக்கிறார். தற்போதைய சூழலில் தான் நடிக்கும் கதாபாத்திரங்களை மிகவும் கவனமாகத் தேர்வு செய்து வரும் நவீன் சந்திராவின் திரைப்பயணத்தில் 51-வது மைல்கல் படமாக (NC 51) உருவாகும் இப்படைப்பு, ஒரு புதுமையான கதைக்களத்தை மையமாகக் கொண்டுள்ளது.

விறுவிறுப்பாக நடைபெற்று வந்த இத்திரைப்படத்தின் ஒட்டுமொத்தப் படப்பிடிப்புப் பணிகளும், கடந்த திங்கட்கிழமை (அக்டோபர் 26) அன்று சென்னையில் முழுமையாக நிறைவுற்றது. இத்திரைப்படம் திட்டமிட்டபடி மிகவும் சிறப்பாகவும் நேர்த்தியாகவும் உருவாகியிருப்பதைப் படக்குழுவினர் அனைவரும் ஒன்று கூடி கேக் வெட்டி உற்சாகமாகக் கொண்டாடினர். இப்படத்தில் நவீன் சந்திராவுடன் இணைந்து ஹரிபிரியா ரோஷிணி, பிரபல நகைச்சுவை நடிகர்கள் பால சரவணன் மற்றும் காளி வெங்கட் ஆகியோர் முக்கிய வேடங்களில் நடித்துள்ளனர். அனீஷா ரெஹானா மற்றும் ஹகினோ ஷுன்சுகி கெவின் ஆகியோர் இத்திரைப்படத்தின் இணை தயாரிப்பாளர்கள் ஆவார்கள்.

இப்படத்தின் தயாரிப்பாளரான பி.ஜி. முத்தையா ஒளிப்பதிவு பணிகளையும் மேற்கொள்ள, சக்தி பாலாஜி இசையமைத்துள்ளார். படத்தொகுப்பை அஜய் மனோஜ் கையாள, டி. கிராபோர்டு கலை இயக்கப் பணிகளை மேற்கொண்டுள்ளார். அதிரடியான சண்டைக் காட்சிகளை டேஞ்சர் மணி வடிவமைக்க, மோகன் ராஜா பாடல்களை எழுதியுள்ளார். ராஜா நல்லையா ஒலிப்பதிவைக் கவனிக்க, மக்கள் தொடர்புப் பணிகளை நிகில் முருகன் மேற்கொள்கிறார். ஆர்.பி. பாலா தயாரித்து இயக்கும் இத்திரைப்படத்தின் படப்பிடிப்பு முடிந்துள்ள நிலையில், இறுதிக்கட்டத் தொழில்நுட்பப் பணிகளைத் துரிதமாக முடித்து, படத்தை மிக விரைவில் திரையரங்குகளில் வெளியிடப் படக்குழுவினர் திட்டமிட்டுள்ளனர்.