கவின் – நயன்தாரா ஜோடி அடிச்ச அக்மார்க் லூட்டி! (விமர்சனம்) ‘ஹாய்’!

கோயம்புத்தூர் பின்னணியில, ஒரு காதல் கலாட்டா கல்யாணம் தான் இந்த ஹாய் படம். நம்ம கவின் இதுல ‘மயில்சாமி’ங்கிற கேரக்டர்ல வராரு. பெத்த அம்மா மேல அம்புட்டு பாசம் வச்சுட்டு, அப்பாக்கு மட்டும் சடார்ட்டுனு பயப்படுற ஒரு சாதுவான இளைஞன். சின்ன வயசுல இருந்தே பொண்ணுங்க பிரண்ட்ஷிப்பே இல்லாம ஏங்கிட்டே வளர்றதுனால, வளந்து ஆளானதுக்கு அப்பாலயும் பொண்ணுங்ககிட்ட எப்படிப் பேசுறதுனு தெரியாம முழிக்கிறாரு. மனசுக்குள்ள லவ் பண்ணணும்னு அம்புட்டு ஆசை இருந்தாலும், வாய் நுனி நாக்கு வரைக்கும் வர்ற வார்த்தையை வெளில சொல்ல முடியாம உள்ளேயே விழுங்கிட்டுத் தாழ்வு மனப்பான்மையோட தவிக்குற கேரக்டர்ல கவின் ரொம்ப எதார்த்தமா நடிச்சிருக்காரு. சொந்த முறைப்பொண்ணே “இவன் வேண்டாம் சாமி”னு சொல்ற அளவுக்குப் பொண்ணுங்ககிட்ட தயங்கித் தயங்கி நிக்குற மயில்சாமி, ஒருகட்டத்துல வீட்ல இருக்குற பிரஷர் தாங்காம சடார்ட்டுனு வீட்டை விட்டு ஓடியே போயிடுறாரு. அதே சமயம், புடிக்காத கல்யாண ஏற்பாட்டுக்கு பயந்துட்டு நம்ம நயன்தாராவும் ‘தேவயானி’ கேரக்டர்ல வீட்டை விட்டு ஓடி வராங்க.  எதற்கும் துணிஞ்ச தைரியமான பொண்ணா வர்ற நயன்தாராவோட ஸ்டார் இமேஜ் அந்த கேரக்டருக்கு நல்ல கம்பீரத்தைக் குடுத்திருக்குது. இப்படி வேற வேற காரணத்துக்காக வீட்டை விட்டு ஓடி வர்ற இந்த ரெண்டு துருவங்களும் ஒரு எதிர்பாராத சூழ்நிலையில நேருக்கு நேர் சந்திச்சுக்கிறாங்க. தேவயாணி’யை பார்த்ததும் காதல்ல விழுந்துடுறாரு மயில்சாமி.

இவங்க ரெண்டு பேரும் இருக்குற இடம் தெரிஞ்சு மொத்த குடும்பமும் வருது. அப்போ அந்த சூழ்நிலை காரணமா நயன்தாராதான் தன்பொண்ணு, அவங்க தற்பொழுது மாசமா (கர்ப்பமா) இருக்காங்கனு ஒரு பொய்யைச் சொல்லித் தொலச்சிடுறாரு. இந்த ஒரே ஒரு தப்பான பொய், ரெண்டு குடும்பத்துலயும் சூறாவளியைக் கிளப்பி விட்டுடுது. பொய் சொன்னதுனால நம்ம கவின் மாட்டிட்டு முழிக்கிற நெருக்கடிகளும், அதனால வர்ற அதிரடி கலாட்டாக்களும்தான் ‘ஹாய்’ படத்தோட மீதிக்கதை. ரொம்ப சாதாரணமா ஆரம்பிக்குற இந்தக்  கதை, பிற்பாதியில யாரும் நெனைக்காத ஒரு திடுக்கிடும் சவாலை நோக்கித் திரும்புது. கவின் அவிழ்த்துவிட்ட அந்தப் பொய் மூட்டையை, தியேட்டர்ல இருக்குற சனங்க ஏத்துக்குற மாதிரி இயக்குநர் விஷ்ணு எடவன் அம்புட்டு சுவாரசியமாவும், எல்லாரும் ரசிக்குற மாதிரியும் கொடுத்திருக்காரு..

இதுல நம்ம நயன்தாரா மாசமான பொண்ணு மாதிரி வேஷம் போட்டுட்டு அலும்பு பண்ற சீன் எல்லாம் தியேட்டர்ல நல்ல சிரிப்பலையையும், செம கலகலப்பையும் ஏற்படுத்துது. கவினோட அம்மாவா வர்ற ராதிகா, எதார்த்தமான நடிப்பால அந்தப் பாத்திரத்துக்கு முழு நியாயம் பண்ணியிருக்காங்க. கவினோட அப்பாவா வர்ற கே. பாக்யராஜ், அதிரடியான வசனங்கள்லயும் சண்டைக் காட்சிகள்லயும் ரொம்ப பிரமாதமா நடிச்சிருக்காரு. நயன்தாராவோட அப்பாவா வர்ற நம்ம பிரபு, ஒரு குடிகார கேரக்டர்ல தங்களோட பிரத்யேக நடிப்பால மனசுல நிக்கிறாரு. பிரபுவை விட்டுப் பிரிஞ்சு போன அவரோட சம்சாரம் உஷா கேரக்டர்ல, யாரும் எதிர்பாராத விதமா டக்குனு வந்து தலைகாட்டுற நம்ம சுகாசினி, ரசிகர்களுக்கு ஒரு இனிய சர்ப்ரைஸா வந்து கைதட்டல் வாங்குறாங்க. கவினோட பிரண்டா வர்ற ஆதித்யா கதிர், ஆட்டம் பாட்டம்னு அந்த நட்புப் பாத்திரத்துக்கு நல்ல பலம் சேர்த்திருக்காரு. இவங்களோட அமிர்தா சீனிவாசன், விடிவி கணேஷ், பெப்சி விஜயன், ரெஞ்சி பணிக்கர், சத்யன், குரேஷி எல்லாரும் தங்களுக்குக் குடுத்த கேரக்டரை பக்காவா பண்ணியிருக்காங்க.

தொழில்நுட்பக் குழுவைப் பொறுத்தவரைக்கும், ராஜேஷ் சுக்லாவோட வண்ணமயமான கேமரா கோணங்கள் இந்த எளிய கதைக்கு நல்லா உதவி பண்ணியிருக்குது. இசையமைப்பாளர் ஜென் மார்ட்டினோட துடிப்பான பாடல்களும், பின்னணி இசையும் இந்த எளிய குடும்பக் கதைக்கு அம்புட்டு பலமா அமைஞ்சிருக்குது. பிலோமின் ராஜோட கச்சிதமான எடிட்டிங் திரைக்கதையை தொய்வில்லாம நகர்த்தியிருக்குது. முதல் பாதியில இருக்குற சில மெதுவான நகர்வுகளையும், நாடகத்தனத்தையும் கொஞ்சம் ஓரமா வச்சுட்டுப் பார்த்தா, இந்த ‘ஹாய்’ திரைப்படம் நல்ல மனநிறைவையும் சந்தோஷத்தையும் தரும்!