ஹிட்லரையே மிரள வைத்த இந்திய உளவாளி!  ‘ஃபௌஜி’ திரைப்பட முன்னோட்டம்!

‘ரெபெல் ஸ்டார்’ பிரபாஸ், இயக்குநர் ஹனு ராகவபூடி, மைத்ரி மூவி மேக்கர்ஸ் மற்றும் டி-சீரிஸ் கூட்டணியில் பான்-இந்திய அளவில் பிரம்மாண்டமாக உருவாகி வரும் திரைப்படம் ‘ஃபௌஜி’. பிரபாஸின் பிறந்தநாளை முன்னிட்டு, இப்படத்தின் வரலாற்றுப் பின்னணியைக் கொண்ட ‘ஃபைல் நம்பர் 25’ (File No 25) என்ற பிரத்தியேக முன்னோட்டக் காணொளியைத் தயாரிப்பாளர்கள் நவீன் யெர்னேனி, Y. ரவிசங்கர் மற்றும் பூஷன் குமார் ஆகியோர் வெளியிட்டுள்ளனர். தேசபக்தியை மையமாகக் கொண்ட இத்திரைப்படம் வரும் 2027 மார்ச் 19ஆம் தேதி உலகம் முழுவதும் திரையரங்குகளில் வெளியாகிறது.

இரண்டாம் உலகப் போரின் பின்னணியில் அமைந்துள்ள இந்த முன்னோட்டம், 1942 மே 29ஆம் தேதி பெர்லினில் நேதாஜி சுபாஷ் சந்திர போஸ் மற்றும் அடால்ஃப் ஹிட்லர் ஆகியோருக்கு இடையே நடைபெற்ற வரலாற்றுச் சிறப்புமிக்க சந்திப்புடன் தொடங்குகிறது. பிரிட்டிஷ் ஆதிக்கத்திற்கு எதிராக நேதாஜி ஜெர்மனியின் ஆதரவைக் கோர, இந்தியாவால் பிரிட்டிஷ் பேரரசை வெல்ல முடியுமா என்று ஹிட்லர் கேள்வி எழுப்புகிறார். அதற்கு நேதாஜி, ‘சுதந்திரம் அடைவதற்கான உறுதியை ஒருபோதும் அணைக்க முடியாது’ என்று கூறுவதுடன், ராணுவ வலிமையைவிட உளவுத்துறை வலிமைமிக்கதாக நிரூபிக்க முடியும் என்று வாதிடும்போது இந்த உரையாடல் அசாத்திய திருப்பத்தை அடைகிறது.

பிரிட்டிஷ் உளவுத்துறைக்குள் புகுந்து பெரும் குழப்பத்தை ஏற்படுத்தி வரும் ஓர் அசாதாரணமான இந்திய உளவாளியின் (பிரபாஸ்) கதையை ஹிட்லரிடம் நேதாஜி அறிமுகப்படுத்துகிறார். தனது அடையாளத்தை வெளிப்படுத்தாமல், ராணுவப் படைகளைத் திசைதிருப்பி, காலனித்துவ நிர்வாகத்தை மீண்டும் மீண்டும் சாமர்த்தியமாக முறியடிக்கும் அந்த உளவாளியின் ரகசியக் குறியீடு பகவத் கீதையால் ஈர்க்கப்பட்டது என்றும், அது ஜெர்மனியின் புகழ்பெற்ற ‘எனிக்மா’ குறியீட்டைவிடவும் புரிந்துகொள்வதற்கு மிகவும் கடினமானது என்றும் விவரிக்கப்படுகிறது. பிரிட்டிஷாரால் அவனது உண்மையான அடையாளத்தை அறிய முடியாமல், நிழலில் இயங்கும் ஒரு வலிமைமிக்க சக்தியாக விளங்கும் அந்த மாவீரனின் கதையாக ‘ஃபௌஜி’ உருவாகி ரசிகர்களிடம் பெரும் எதிர்பார்ப்பை ஏற்படுத்தியுள்ளது.