‘இதயம் முரளி’ –  விமர்சனம்!

பள்ளிப் பருவத்தில் ப்ரீத்தி முகுந்தன் மீதான காதல் தோல்வி, கல்லூரிப் பருவத்தில் கயாடு லோஹர் மீதான காதல் தோல்வி எனத் தொடர் ஏமாற்றங்களைச் சந்திக்கும் அதர்வாவுக்கு, அவரது மாமா நட்டி, ஒரு பெண்ணைப் பார்த்துத் திருமண ஏற்பாடுகளைச் செய்கிறார். இன்னும் சில தினங்களில் திருமணம் என்ற சூழலில், பழைய பள்ளித் தோழி ப்ரீத்தியை மீண்டும் சந்திக்கிறார் அதர்வா. இந்த முறையாவது தன் அடிமனதில் இருக்கும் காதலை வெளிப்படுத்தத் துடிக்கிறார். அதர்வா தன் காதலைச் சொன்னாரா இல்லையா, திருமணம் என்னவானது என்பதே ‘இதயம் முரளி’யின் மீதிக்கதை.

காதலைக் கலர்ஃபுல்லாகவும் ஜாலியாகவும் சொல்ல நினைத்த அறிமுக இயக்குநர் ஆகாஷ் பாஸ்கரனின் ஆசை நிறைவேறவில்லை. அழுத்தமில்லாத திரைக்கதையில் தேவையற்ற ஆடம்பரம் மட்டுமே மிஞ்சுகிறது. படம் முழுவதும் வழிந்தோடும் அப்பட்டமான செயற்கைத்தனமும், முரண்பட்ட காதல் சம்பந்தமான கருத்துக்களும் ரசிகர்களைப் படத்தோடு ஒன்றவிடாமல் தடுத்து விடுகிறது. அதர்வா தன் காதலைச் சொல்வதற்குச் சூழலில் எந்தவிதமான இடையூறும் இல்லாத நிலைதான் படத்தில் உள்ளது. அப்படி இருக்கும்போது, அவர் காதலைச் சொல்ல முடியாமல் தவிப்பது போன்ற காட்சிகள் அப்பட்டமான செயற்கைத்தனம்! இந்தத் தவிப்பு படத்தின் பெரும் பலவீனமாக மாறுகிறது. காதலின் உண்மையான வலியையும் ஏக்கத்தையும் ரசிகர்களிடம் கடத்துவதில் இயக்குநர் ரொம்பவே சிரமப்பட்டிருக்கிறார்.

ப்ரீத்தி முகுந்தன் & கயாடு லோஹர், பலவீனமான இந்தத் திரைப்படத்தைத் தங்களின் வசீகரத்தாலும், சிறப்பான நடிப்பாலும் ஓரளவிற்குத் தாங்கிப் பிடித்துக் காப்பாற்றுவது இந்த இரு நாயகிகள் தான். இவர்களுக்கு அடுத்து ‘பரிதாபங்கள்’ சுதாகரும், டிராவிட்டும் தங்களது எதார்த்தமான பங்களிப்பால் படத்திற்கு ஓரளவிற்கு உதவுகிறார்கள். ரக்சன், தமன், நிஹாரிகா, ஏஞ்சலின் மற்றும் ஜோனிடா ஆகியோர் தங்களுக்குக் கொடுக்கப்பட்ட பாத்திரங்களின் வழியே திரைக்கதை நகர்வுக்கு ஓரளவிற்கு உதவியுள்ளனர். சின்னி ஜெயந்த் வரும் காட்சிகள் படத்திற்கு எந்தவொரு விதத்திலும் ஒட்டலையும் தராமல், உதவாமல் கடந்து போகின்றன.

மனோஜ் பரமஹம்சா, சி ஹெச் சாய் ஆகிய இருவரும் திருச்சி, மதுரை முதல் அமெரிக்கா வரை அனைத்து லொகேஷன்களையும் மிகவும் நேர்த்தியாகவும், அழகுடனும் படமாக்கியுள்ளனர். இசையமைப்பாளர் தமனின் இசையில் பாடல்களும் பின்னணி இசையும் ஓகே ரகம்.

கண்ணைக் கவரும் லொகேஷன்கள், ஓகே ரக இசை எனத் தொழில்நுட்ப ரீதியாகப் படம் வண்ணமயமாக இருந்தாலும், அசல் காதலுக்குத் தேவையான ஆன்மா (Soul) இதில் இல்லை.

மொத்தத்தில், ‘இதயம் முரளி’ –  ஆழமில்லாத திரைக்கதையால் ரசிகர்களின் இதயத்தைத் தொடத் தவறிய ஒரு செயற்கையான காதல் பயணம்!